邊到拜神最靈？

有時聽到有d人話返去邊d名廟拜神，又話邊到邊到好靈，有d拜開既又話起碼連續三年都要拜，總之有好多，其實拜神哩家野有冇需要好似爭名校咁要出名呢？

每次講起d大廟（包括大陸，香港定係澳門），我都只係諗起一樣野，就係「商業」。好多廟宇都好商業化、高價收入場費、收既香油錢又或者拜神買既香燭錢都係一流收費，至於拜完神之後得到既係咪一流功就...？我記得自己既老師有講過其實廟宇一旦商業化，個神就唔會坐係入面，雖然哩樣野無得考證，但我自己個人覺得幾有道理，當作為與神溝通或者接觸既地方一旦商業化同世俗化，就會變得同出面既舖頭，商業社會平時既生活有咩分別呢？實際上商業化既廟宇收到d錢都唔係去左個神到，而且神明亦都唔會需要因商業理由或者金錢而畀面，除非d錢扣哂日常開支之後用黎做哂善事就可能另作別論，但係哩個可能性有幾高呢？我都唔知，因為我唔係管廟既...但大家去拜神既話記得記得真係要搵d唔好商業化既廟宇，如果唔係真係哂氣。

之前有篇BLOG提過話其實人好多時都係好現實，去到真係拆唔掂先求神。雖然我唔係神，但係有副對聯我相信好能表達到神明對人類欲望既回應，唔...又係時候拋下書包啦，「降福豈能徇眾願，問心當不愧神明。」簡單d照字面解釋就係，實現願望又點可以個個人都可以畀你？你問心做既事同行為值得神明幫你先啦。呢對對聯係掛左係澳門城隍廟門口，大家有時間可以去睇下，其實諗落都幾有意思；講真，點解神明要幫你，又或者求神幫之前其實都要自己問下自己值唔值得個神幫。除左自己平時有無做善事之外，就係有無盡力做好自己；兩個例子，例如你求神保你平安大吉，諸事順利哩類既就好自然睇你有無做善事。如果你求工作順利，人緣好，但自己個人又成日發脾氣或者性格太自我既，就算有緣份畀你遇到好人、貴人，都會畀你嚇怕。再者，個神知你平時臭脾氣又或者工作懶散，佢都無mood幫你喇...

講左咁耐，好似叫人唔好拜神要靠自己，我自己有朋友聽完都問我咁其實係咪我研究神秘學都最終覺得做人都係要靠自己。以西方神秘學思維黎講，就算做左法術同儀式之後你既行動都要配合你既意願先會令到個法成功，你話如果做完法術求財之後淨係坐係到等人畀錢你既話哩個係no point，又或者咁講，法術同行動係相輔相乘，當然如果係召喚之類既大型魔法就係另一回事喇；不過哩個世界都有例外既，歷史上就有記載Aleister Crowley就係做完儀式之後將自己本身有既錢都用埋去飲酒，當然哩d傳奇人物就緊係過幾日就收到一筆佢足夠用既款項...有機會我研究到點做到之後再話畀大家聽，不過到時可能我已經雲遊四海唔寫BLOG了～哈哈！

最後老土d都講一句，要神明保你最重要唔係拜得神多，而係做個好人、多做好事善事，心存正念。

自己親手整既Earth Pentacle

Earth Pentacle，通俗少少叫錢幣，好多時都會係塔羅牌入面見到既一個個錢既其實正式叫Earth Pentacle，因為錢本身係對應土元素，所以前面有個Earth。而佢其實係儀式用具黎既，大家見到相入面既係我自己整，當然只係填色同文字部份啦！我唔會咁勁識將木板界到圓...

塔羅牌既魔杖、寶劍、聖杯同錢幣其實係分別對應西方神秘學中四種唔同既元素，同時代表方位，哩四樣野其實亦都係西洋魔法師會用到既工具；當然所有既野都要用錢買...但係祭壇上面對應土元素既北方擺既係，一塊叫Pentacle既圓餅，而唔會真係擺個圓形錢幣係到...= ="哩一點要搞清楚...

自己做得哩行、學習黃金黎明學派既，當然都會有個Pentacle啦，而其實最先整最基本既都係Pentacle先，因為所有既修練同基礎都要先打好整體既根底，就好似起樓打樁咁，拋下書包仔講返句"Unless Adonai build the house, the house will fall." (Adonai係希伯來文既發音係指「我的神」的意思，而且係對應土元素)，另外剛好土元素係其他三種元素之後最後而成亦都係包括前整三者，所以點解話最先既會係Pentacle先就係咁解。

製作方式其實唔算太難，係稍為麻煩，搵塊圓形木板係上面畫左d線再用Acrylic填返相對應既顏色，寫埋希伯來文之後補返層保護油就OK了，不過整完一次之後，如無意外，都唔會想再整多個...

一開始係咁的..

跟住一變！

至於大家一開頭見到上面寫既野到底係乜野同點寫上去，遲d有機會再講。

係最絕望的時候，你會求邊個？

雖然宗教係社會上佔有重要角色，但其實而家好少人有宗教信仰，例如個個星期日去教堂，又或者成日拜神（係我認識既圈子入面真係好少..）大家平時返工放工咁忙，好多人放左工都去happy hour，又或者訓覺；會拜神時候通常都係年尾年頭，又或者聖誕節子夜彌撒去教堂感受下氣氛，另外仲有一個時候，就係觀音開庫...

其實簡單d黎講，人都係比較現實，好多時真係有需要又或者感到無助既時候先會去求神拜佛，求神拜佛哩四個用得好多既字都唔係同你講阿彌陀佛講修行，而係好實際真係唔掂喎，乜都無哂計去到絕望時真係唯有求神幫，就當係最後既方法。係港澳社會比較普遍既都係天主教基督教、佛教又或者道教；其實邊個都好，大家都會有自己既目的或者想解決既煩惱，但通常一般都係選擇屋企人信開又或者感覺比較熟悉既宗教神祗，斷估係港澳社會無咩人覺得前途暗淡既時候係去搵太陽神阿波羅掛？

但係對於西方神秘學界既人，尤其係港澳地區既，係哩d情況選擇困難其實會比一般人會多少少，傳統西方神秘學係儀式上會搵既高靈又或者神祗本身都比較多，情況就好佛教入面有佛、有菩薩，道教又有好多唔同既神靈，不過其實呢個都無咩所謂，都係屬同一宗教入面。但有一d西方神秘學學派所包括既唔止一個宗教既神祗既時候，就會開始有哩d問題啦，就好似黃金黎明入面會接觸到天使而又會請埃及神祗咁。我有個同門既朋友佢係遇到問題時會搵埃及神祗入面既Thoth同Maat去解答又或者畀啟示，而我自己就偏向中意搵大天使，嚴格黎講我都仲未試過搵埃及神祗，唔...反正哩d都係個人喜好。不過以我經驗黎講，佢地對事身既睇法或者能量係可以好唔同。

好啦～講左咁耐，問題黎了，連我自己都思考緊未識答。上面頭先講緊既神祗同天使都會可以係同一個派別入面到出現，但打個比喻，如果此時此刻我身邊好重要既人突然發現身體有事，得返三四年命甚至可能仲短既時候，其實我自己都唔知會搵邊個，以自己所學所識既能力可以做西洋魔法儀式，搵Adonai、Shekinal、大天使之類...但係係顧忌自己做儀式可能會帶黎既業力問題時（因為就好似自己落指令去引導改變），可能會選擇祈禱；但另一方面，又其實可以簡單一d，唸觀音經、白衣神咒之類，尤其係對於我地哩d宗教背景可能稍為多元化又或者唔同方面既野都識既時候。

但其實最大既考量唔係邊個有效d，而係作為擁有多神信仰，即係相信世界上有天使，亦都會有精靈、菩薩唔同既高靈，你係信佢樣樣都有既時候就有時唔知搵邊個好（當然要錢我覺得自己唔會去搵財神..），就好像上面所講既例子，感覺無乜理由自己做儀式搵天使幫那個重要既人做儀式求佢健健康康，跟住轉個頭又去唸觀音經...我自己都覺得怪怪地咁...可能係我自己過唔到心理關口掛？

大家有咩意見歡迎發表下討論下哦～！

Whatapps - 令我們變得這麼近 那麼遠

Whatapps－唔駛講大家都知係咩既apps，而且仲令好多人又愛又恨，咩兩個剔剔、最後上線時間、又可以即時傳送埋咩位置之類。其實同以前既icq、msn比，除左上述因素外，佢既模式其實我覺得係令人與人之間既距離又近左又遠左，就正如題目所講既這麼近，又那麼遠。
點解近左相信大家日常生活已經完全體驗到，但點解又會話遠左呢？可能有d人會話：「唔係喎！由全天候24小時拎住個電話隨時都send到又收到message，又有埋最後上線時間，收唔收到同幾時睇到都無得走雞，邊有遠到？」「仲有得send相而又可以錄音連voice message都可以儲到一大埋添！幾時睇返都得。」

哩d全部都係事實，不過只限於同你好熟既朋友又或者情人，因為真係可以畀到大家不停咁傾；但其實有一樣野會係大家會係msn到做但又唔多會係Whatapps做，估下係乜？就係你唔會無啦啦去hi人，以前玩msn或者icq戈時見人地上線，就代表對方係得閒可以傾下計，又或者見到好耐無見既朋友會主動hi下，搵d野傾下又或者睇下對方哩排點；個感覺就好像咁岩係msn見到佢係到，自己又無野做有人上線咪搵佢傾下計。試過有幾次就係咁一d生疏左既朋友又變返有來往。

同樣地，大家會寧願係msn傾幾句或者主動問候下人而唔會無啦啦突登打電話去畀一個好耐無來往既朋友睇下佢點，總係好似有d怪怪地咁。普遍黎講用msn或者icq會聯絡d好耐無傾或者來往既人（早排興返一輪icq戈時開返就係），而Whatapps正正就係因為24小時都會搵到，又唔知對方做緊乜又係咪得閒，感覺就好似打電話咁，又唔會無啦啦特登搵人，變相反而將本來無乜來往或者生疏左既朋友更加少機會聯絡，拉得更遠。

溝通既模式同發展雖然係由人類自己發展出黎，但往往時代的潮流又逼住大家去接受，正如我自己個人覺得而家話完全唔用facebook、Whatapps，淨係用icq既話，顯然同現今既社會脫左截；而家交換既聯絡方式會係facebook同手提電話，你試下好似以前細個咁問人羅屋企電話，又或者交換icq。。。相信聽到既人會O哂咀，嘿嘿。大家可以下次識到新朋友戈時試下…^_^

其實大家對於自己既朋友，就算真係少來往，其實都可以唔駛覺得怪，主動d去多聯絡，畢竟做到朋友都係緣份，雖然現代社會個個生活都好忙，好多野做，但係好多事好多人，並唔係要到你得閒既時候先去珍貴。

十二星座的迷思

進入了新的一年並不是過了很多時間，相信很多人都在新年前後都會看過一些新一年的十二星座運情如何如何，即時不是新年前後，平日坊間亦會看到很多類似「最ｘｘ的十二星座」、「遇到ｘｘ情況的十二星座會怎樣」、「十二星座情人分析」又或者「本週星座運情之類」。但人的性格與運情真的只是分十二種嗎？顯然不是，有很多人也用這個原因來否定十二星座論，的確，現在一般的十二星座說與傳統的神秘學(Occultism)及占星術(Astrology)實在沒有太大關係，筆者對於現在一般所說的十二星座亦只能一笑置之。
因為真正的占星術按照出生年月日時分來開立星盤計算。　　

那麼現在的十二星座分析到底是怎樣來的呢？雖說現在市面上很多星座達人，但卻好像沒有人指出最早第一篇在報章上的十二星座運情分析是什麼時候？是哪個人寫？怎樣發生的？1930年的8月份，英國瑪格麗特公主(Princess Margaret)剛剛出世不久，而當時《週日快報》(Sunday Express)的編輯John Gordon想以嶄新的手法報導公主的出世，就邀請了當時的占星界名人Cheiro為公主一篇占星命盤的分析，但由於當時他無暇應邀，結果這個工作就落到他助理R.H. Naylor的手上。而1930年8月24日出版的《週日快報》就刊登了公主的星盤作了概括及廣泛的預測，及按照出年月日為那個星期出生的人作了簡單的運情預測，這就是首次出現於報章上的大眾化運情預測及十二星座分析的初型。　
接下來的九月份開始R.H. Naylor同樣地以出生月日作運情預測，當然反應十分熱烈，除了很多人關注《週日快報》的運情預測外，R.H. Naylor亦十分自然地一夜成名。但一直的運情預測所提及的卻只是當月份出生的人，例如九月份的運情預測亦只是針對九月份出生的讀者，這當然不能滿足讀者的需要，畢竟一份報章的讀者肯定是出生於不同的月份。就是在這樣的情況下，十二星座運程的預測分析便應運而生了。
所以十二星座運情分析最早只是拿著少量占星的皮毛來發揮的玩意，的確每個太陽星座相同的人會有共同的特點，但只用太陽星座的方式實在過於廣泛及沒有什麼價值，占星術的預測還必須考慮很多其他因素同及預測技巧；然而今天這種形式已演化成一提及星座就令人想起的主流，某程度上是為西洋占星扣上了不實之名。在這裡筆者並沒有詳細地介紹占星術，因為本文主要用意其實旨在是令讀者反思十二星座的和可信性與嚴謹程度，如果這篇短文引起了讀者對占星術的興趣，讀者們不妨考慮花時間深入研究占星術，學習真正的古人的智慧。　　
雖筆者並不是專門的占星學者，但由於神秘學與占星學有著很特殊的關係，例如西洋魔法儀式進行之前都會使用占星術的知識來擇日和時間、符咒上使用行星的符號等等，因此亦明白到占星是一門非常專業與歷史悠久的學問；下次當大家看到雜誌封面或星座書上面說到什麼星座大師為你解說來年運勢時，就只當作參考或是茶餘飯後的娛樂好了。