萬聖節之後的諸聖節與追思節

每年既11月2日，對好多澳門人黎講係休息既一日，因為哩個係澳門既公眾假期（廢話，不過我發覺好多香港朋友都唔知...）；當然如果係紅底學校或者返工係跟勞工假既朋友就無得放啦，但係政府部門、大學、銀行同埋好多寫字樓工都放。同萬聖節咁近，請假請埋11月1日咁10月31晚玩到癲一癲都有兩日可以休息下啦。

當然兩個日子如此接近又係西方節日，其實萬聖節同追思節都真係幾有關係的；話說塞爾特人過左咁多年萬聖節既傳統，據說到後來天主教傳教士踏上哩遍英倫土地見到如斯情境當然唔高興。於是就係後面11月1日整左個諸聖節（All Saints Day），係紀念同贊頌天上既靈魂與聖人，再之後戈日就追思節（All Souls Day）就係用黎紀念先人同埋為煉獄既靈魂祈禱，等佢地可以早日上天堂；因為係天主教入面除左有天堂地獄之外仲有個煉獄，係畀d有犯罪但罪不至下地獄既人受苦，等佢地既靈魂煉乾煉淨先可以上天堂，而煉獄既靈魂係唔可以為自己祈禱，只能夠係在世既人為佢地祈禱。以前中學讀天主教學校既時候就每逢11月既彌撒同埋早禱唸經都會話特別為煉靈祈禱。

講講下好似有少少離題添，講返兩者既關係，我自己亦都有睇過有d天主教會組織或者宗教人仕指萬聖節係源自11月1日既諸聖節，又話Halloween係諸聖節（All Hallow's Eve）既愛爾蘭口音誤讀；雖然我無正式去翻查文獻又或者作什麼浩大考古工程，但以時間黎講，塞爾特人過萬聖節都過左唔止2000年，係耶穌出世之前就已經有了。如果計返教會成立之後傳教傳到去戈邊先再由愛爾蘭口音原因誤了個萬聖節出來的話，咁之前d記錄又點解釋先，其實有時我都覺得天主教既學校一樣有洗腦，只係大家多年黎已慣左所以已經唔覺得係d咩野...

Anyway，戈日放假的確係畀信仰天主教既朋友一個日子去紀念先人同埋為煉獄既靈魂祈禱，而對於我黎講多日假期可以訓到自然醒亦十分感恩，反正有假放就好了，而且今年既追思節係星期五，連住星期六日...正！

人地講鬼節，自己又講下鬼節。

每年農曆七月都會見到有d中式玄學師傅又或者法科師傅都會寫下d同鬼節有關既野，而家係十月份今個月最後一日係萬聖節，我都應該要應下節寫d野介紹下既，雖然萬聖節同我主修黃金黎明既無乜太大關係，反而春分秋分緊要d。

萬聖節其實係起源自英國、愛爾蘭戈邊塞爾特（Celtic）既本土民意宗教信仰德魯伊教派（Druidism），10月31日對佢地黎講係收成既日子亦都代表戈一年工作既完結，11月1日則係新一年既開始。而10月31日戈晚就好似鬼門關大開咁，大家自由奔放地走哂出黎（其實有時我諗，係咪知大家收成所以走上黎要分d野，岩岩秋天收成，實羅到d野啦！），正所謂「過門都係客」，大家就一齊玩了，10月31日戈晚根據德魯伊既傳統佢地會進行祭祀（Samhain）同埋以篝火晚會咁既形式黎慶祝，亦都順便祈求來年風調雨順。（聽落其實都幾開心幾好玩，係個秋高氣爽既日子大家晚上係森林圍住個火堆慶祝一年豐收，大家做左成年野可以happy下，同埋歐洲既10月尾估計應該唔駛用蚊怕水...）

萬聖節其實同中國既盂蘭節有樣野似就係係戈個日子，大家不分係人係鬼同歡共樂（曾經聽過有法科師傅講話其實佢地好中意係熱鬧同人多既地方玩）；可能有d朋友會覺得，「唔係喎！七月好恐怖喎，又周街燒野又成日聽到人話七月好易撞野！」當然哩個唔多唔少受到商業電影、流行小說所影響，但其實本身七月既鬼節係應該開開心心，燒野畀佢地係幫助下人嫁麻。至於西方人既鬼節，我諗係因為西方人既文化普遍都好似比較貪玩d同玩得盡興d，所以其實有相似意義既鬼節則以一個好唔同既形式表現出黎了。

另外，大家11月2號有既公眾假期追思節（香港既朋友可能唔知係咩，哩個係天主教節日，亦都係澳門有得放假...哈哈），其實都係同萬聖節有很大關係，下次再續。