動力與題荒

相信大家都知道小弟一直都係副業形式黎做占卜既工作，然而最近忙緊新既工作所以幾個月都無更新，但係就多左頗多人睇完我哩到寫既野而想搵我占卜。其實都有少少驚喜，因為一直都諗住自己咁懶無乜更新都應該無咩人睇，甚至乎可能完全無人睇；但事實視乎有少少出入，起碼叫想像中多，所以其實某程度上都畀到少少動力，又或者壓力推我去係到寫下野啦～哈哈。

因為原來寫既野真係有人會有心機睇下。

其實有時唔係唔想寫，只係好多時都會想寫d特別少少既野，又或者至少唔想咁「行貨」，變相就其實諗題目就比較難了，當然可以話自己係哩方面要求可能會想高d，但係要保持住有野寫有野出其實真係唔容易；所以我自己對於有d人可以真係做到日日有blog文出既人係非常佩服，因為要求既唔單止淨係個腦要諗到題目或者想講既野，要有咁好心機日日堅持先係最難得。

講到哩到，下一篇要寫d咩已經大概諗到，會快d擺上黎XD，遲d再談。

罐頭祝福短訊...不悶嗎？

你最近收到的祝福訊息，是市面上早已打包好用來互傳的罐頭訊息，還是朋友逐個逐個字打出來發給你的訊息呢？

剛進入2014年，「三、二、一！Happy New Year！」相信很多人在Whatsapp都收到不少新年快樂的祝賀短訊、圖片又或者短片，反正包羅萬有。不過，其實當你收到的時候，你會否覺得「嘩！好開心呀！」？相信很多人都會，用兩秒不到的時間，望一望，「哦。」，然後要不然一句「Thx~ u too^^」，又或者複製其他朋友傳送過來的短訊（當然是其他款式的罐頭），然後傳送比這位眼前要回覆的朋友，按下傳送鍵，兩個剔剔，傳送完畢，任務完成。

其實就像要交功課又或者為傳送而傳送，又或者你收到這樣的短訊時，其實會真的感到窩心與溫暖嗎？

踏入2014年的時候，我收到一個毫無裝飾的祝賀短訊而令我覺得「咦？OK WO，好多謝你。」

內容是這樣的：
「Hey Justin, 新年快樂 Happy New Year ah! 知你最近搵緊舖想開茶室, 祝你新一年可以搵到做你想做既野啦, 得閒keep cotact~^^」

簡單的文字與心意，有時候，會比眼花撩亂的emoji及圖像更令人覺得窩心。因為看得出這個訊息逐隻逐隻字打出來，而不是去銀行匯了幾千萬給您，千萬要快樂、千萬要健康、千萬要......同時收到兩個這樣的訊息時，當時當刻，你感到的又會什麼呢？

下次，當你想再廣發賀年短訊又或者節日祝福時，倒不如特別選擇幾個尤其重視的人，簡簡單單打幾個字，直接打出那個人的名字，送上你對他們真誠的祝福吧。

沒有華麗的圖案、沒有可愛的動畫、沒有精心的設計，廖廖可數的幾個字，有的真誠的心意。其實，那些精美設計的短訊，只是「複製」，然後「貼上」，跟超市貨架上的罐頭一樣清一色的感覺。

如果喜歡的話就請轉載，令多一點人看到，希望可以令人與人之間的溝通真實一點，而不是罐頭訊息周圍飛吧。

末日末到悶了

藏曆排百年 專家駁末日論

每當睇到哩d新聞其實都覺得好悶，一早已經有好多人或學者講左今年十二月唔會係世界末日，我自己個人黎講亦都唔相信，就算可能真係進入新既週期又或者有野開始發生，都唔會好似熄燈「噗！」一聲d野就無哂或者幾日就地球滅亡啦，家下返冷幾日後轉涼咩，世界末日喎，如果真係末日，個末日都應該係連續好多年一直有災難或者愈黎愈嚴重最後先滅亡啦，當然如果用核武你炸我炸又另作別論。

至於有好多New Ager講既咩進入水瓶座時代d人開始追求靈性，又點樣進入新週期，我都係用同一個邏輯，一個週期約二千五百年咁長，就算真係變都需要好幾十年甚至過百年，所以就算會有野開始變都好，大家都未必會咁快感受到，又或者唔會係有生之年見到成個風氣變到好似網上好多流傳既資訊講到咁神奇（假設會真係有改變發生）。

最後，其實真係會有變化進入新紀元，定係其實大家厭倦現世既生活，所以欲望就投射出形成New Age追求身心靈既風氣？又抑或係其實係相輔相乘呢？哩個係值得深思的。

到底係手機定日記？

最近小弟換左新電話，終於闊別用左差唔多兩年部HTC，換左新機除左感受到流暢既速度同可以影靚相化外，亦都驚覺，點解自己可以容忍到用部龜速機用到咁耐...當然係好開心玩緊部新機之前，我已經將部舊既HTC小心翼翼咁保存好。

其實隨住功能愈黎愈多，手提電話愈黎愈緊要，哩到我唔係指純粹既打電話、send message、隨時check-in、影食物相擺埋Post up上facebook、銀行既流動理財、即時睇股票價格、查天氣、check email等等。當然唔係話哩d功能唔重要，只係哩d功能可以好隨意係第二部電話到用到；而記錄係電話既文字訊息同紀錄呢？就唔係咁易了，往往一部電話對主人最重要既地方，撇除日常功能，就係入面既相同message，簡單黎講係擔當日記既角色。

講起日記，曾幾何時有一輪好流行，但係曾經何時講緊既到底係幾時呢？「日記」而家聽落去既年代就好似阿媽少女年代既心事典藏，寫著今日同好姊妹搵青草街盲公問卜問姻緣講左d乜，又或者令人想起民國時代冬菇頭既北大女生晚上係宿舍寫著如何帶住熱血與理想組織學生運動，期望推動國家改善腐敗，急起直追，一雪中國人百年來的恥辱。

雖然而家已經冇咩人寫日記，但而家大家手上既智能手機，每日來來回回既message、whatapps、LINE、微信、手機入面既相同短片等等，其實早已稍稍地為交織出一篇又一篇真實無遺既日記，記錄低每日生活既喜怒哀樂同埋同身邊既人既溝通，包括阿媽既催歸家食飯短訊、同情人或者曖昧對象來來回回既甜言蜜語、同人嗌架時衝口而出忍左好耐既怨言等等...係呢個時代，經Whatapps、message講既野其實仲可能多過係電話同面對面講既野，再者，電話入面既文字全部都有紀錄，除非你刪走佢，如果唔係幾時睇返都得，我估好多人都應該試過係巴士、又或者夜晚係床到拎住部電話係到LOOP，睇返同一d重要既人既chat record。所以，當我換左新電話之後，唯一唔可以換走落新電話到既，就係入面既文字記錄，哩個亦都係令我會繼續好好保存我部電話既原因。

最後，大家有幾多次睇完電話既message會對住個電話微微嘴笑又或者好苦惱呢？種種勾勾起我地情緒既回憶、帶黎希望與失望既事、其實好多時都記錄左係我地既電話當中，我諗，老左既時候睇返電話所記錄既野，其實都應該會幾搞笑。

我自小的魔法師志願

最近有個非常要好既朋友達成左佢細個一路以黎既夢想，就係成為機師係香港既機場駕駛住飛機升降，呢幾日佢終於佢達成到仲影左好多相畀我睇，身為佢朋友當然替佢咁感到高興啦，佢亦都好開心好激動咁同我分享佢既感受有幾大、有幾感動。講真，可以一路堅持不畏風雨咁追隨自己既夢想係好難得，可以成功做到就更加難得，所以對佢既堅持我真係由心地佩服，唔知道有緣睇到哩到既朋友們，你地又有幾多人係堅定不移既道路上追求自己既夢想呢？

當佢好開心咁同我講既時候，其實都有令我反思返自己既志願，到底其實自己係想點？諗返起細個（大約四歲到）既志願，其實係真係做一個魔法師。聽落去其實好好笑吧？相信而家既大人如果聽到一個小朋友想做魔法師的話，都會係覺得「哩個靚仔睇得太多電視打得太多機啦...」；當然當其時既我的而且確係發緊夢啦，未聽過塔羅牌、什麼符咒法術，更加唔好講咩黃金黎明、Witchcraft、卡巴拉、天使學之類，只係當時覺得「魔法師」哩樣野好型好正咁。不過，對於靈異事物同埋科學解釋唔到既超自然事物，的確係自小已經有興趣，可能係出自於對世界既好奇掛？反正哩d野，都冇點解。

係去到後來大約中二、三到就開始真正接觸到我頭先講既專業名詞，「嘩！原來真係有魔法。」，當然深入了解左之後又發現係另一個世界，又有幸地認識到自己既啟蒙老師，發現同想像中既野又好唔同，但係又真係開展左自己既眼光同埋思維，於是就開始追求了。而哩類型既興趣同占卜算命既行業，係陳振聰件事爆出黎之前，已經好多時畀人感覺呃神騙鬼、難登大雅之堂。而我唔信哩d野既父母當然唔多中意我接觸哩方面既野，覺得無聊哂時間，但好在都無點太大阻止，始終我讀書無問題順順利利畢業然後而家做緊份銀行工就OK；試下如果我話要辭職潛心鑽研，可能佢會羅住把刀押我返工好似押赴刑場咁(講笑)。事實上，話辭左份工去潛心修行、不食人間煙火，自問無咁既慧根去到哩個地步；靠呢行搵飯食現階段亦不太實際。當然，自己希望有一日係哩方面會學有所成去到超高手境界，而家亦只得靠自己慢慢繼續努力。

不過講真，有幾多人既夢想係真係好實際呢？可能大家會聽到有人想嫁入豪門、有人想買野唔駛睇價錢、有人想考到CFA / CPA做金融才俊；係哩個拜金主義社會，其實又有幾多人會知道自己個心係想做咩先開心，又或者記得自己細個既志願又去努力實行緊呢？做緊會計師、財務分析師既、係投行每個月抖緊超過十皮、每日為英美股東搏殺既金融才俊美女，又或者近d，係澳門賭場搵到好多錢既人，其實有幾多小時候既志願係想做哩d呢？定係其實都只係「打份工姐」既心態呢？

我都唔知...但如果一個小朋友，唔好話幾歲，就算有十二三歲既，同我講佢志願係四大到做會計師（會計界既朋友請恕我覺得會計好悶同好似無乜工作上既滿足感）又或者話做投資銀行搵大錢既話，我會覺得好恐怖，同埋好懷疑到底佢真係真心想做，只係父母親戚不斷灌輸佢哩行實搵到工搵到錢又穩定又係專業人仕既結果。當哩種風氣愈來愈強，愈黎愈年輕化既時候，我地既社會會變成點呢？可能大家都會放棄做d似乎唔可能，但又可能其實令人生好精彩、令自己好滿足既事吧。

我個好朋友佢細個話想做機師時都有受過人地既冷言冷語，覺得讀學渣飛機出路太少，又好難，唔會成功之類；然而佢而家就真係成功，仲好享受自己既生活。其實講到底，都係要自己堅持，有時都要反問返自己一句，到底自己既堅持又有幾多呢？

祝願大家　初心恆在

塔羅牌與名牌包包

塔羅牌其中一種最特別既地方係一種占卜術但係可以有好多唔同樣既架生，哩到我指既架生即係可以有好多唔同款既牌，唔同文王卦大家都係用三個乾隆錢，又或者好似地卜咁係沙地或者有紙有筆就搞掂；我諗就算唔係行內人都會知或者見過有好多唔同款既牌，而我亦都相信冇乜塔羅牌占卜師會一副用到老，又或者用過哂所有牌，畢竟人總係會貪新鮮想擁有多d但係又冇可能擁有哂全部既，正如好多女生會為Hermes、miu miu、Dior、Gucci既包包瘋狂但我估應該無乜人會買齊哂所有袋...

占卜師用唔同既牌同女仕們用唔同既包包一樣，代表左自己既喜好之餘，亦都突顯出自己既品味同眼光。塔羅牌一樣有好幾種唔同風格，有法式古典詩意既馬賽塔羅(Tarot de Marseille)、現代風格與神秘學元素結合既偉特塔羅(Rider Waite)、由神秘學天才Aleister Crowley創作充滿奇幻風格既托特牌(Thoth)...等等其實仲有其他，不過小弟就快詞窮了...哈哈。

其實如果係特別d又難既塔羅牌，仲可以流露出自己係神秘學上既深厚底子，正如手握Magickal Tarot of Golden Dawn，一張張牌排出生命樹牌陣，雙目有神咁同客人講解希伯來字母同牌義既對應，點樣竊漏左解決而家係感情上既困局；當然亦都會有人純粹覺得「我要型！」而搵d出名難既牌黎用，但係乜都唔識隨便黎既情況下，根本就唔知副牌型係邊，感覺猶如某d暴發戶走入包包名店到大聲喊叫「給我拿個最貴的出來！」，掃完最貴貨之後坐係石梯級到抽番啖戒不甩忘不了的紅雙喜，卻不知道手上「那個最貴的」到底貴係邊...

當然回歸到最原點，手袋可以純粹當真係羅黎裝野唔睇款，牌亦都可以用最基本最原始，設計唔係亂咁黎，占得準就得。始終，占得準緊要過用副靚牌。

話時話講起名牌手袋Hermes，其實Hermes係神名亦都同神秘學好有關係，有緣再講。

西方神秘學諺語 - To know, to will, to dare, to be silent

好多時唔同既教派都有諺語又或者座右銘，感覺上東方既好似稍為多少少，比較普遍同經常聽到既有道德經既「道可道，非常道。名可名，非常名。」同埋金剛經既「一切有為法，如夢幻泡影，如露亦如電，應作如是觀。」就算唔完全知道解咩既，聽落去都感覺到大智慧盡在其中，相關解釋係網上亦都有好多所以我係到都不多作解釋；今次為大家介紹既係西方神秘學用得幾廣既一句諺語 - "To know, to will, to dare, to be silent"。

睇落去相信好多人都會識哂所有詞彙，但係點解呢就可能考起唔少人。當然如果有神秘學底既睇落去可能會易明d或者大概估到佢想講咩；當然同一般既西方神秘學一樣，哩句話對應四元素又或者象徵符號之類，但基本意思其實唔難理解，又或者咁講，我自己個人覺得係學習應有既態度。

To know係指係靈性修行上察覺及知道靈性成長既旅程同埋知道要繼續學習先可以達到真理。

*To will意思係指知道之後有意願去實際作出行動。

*To dare即係對於未知既前程、困難同挑戰刷勇於面對，就好似要減肥戈時夠唔夠意志呢個困難都堅持日日6點起身跑完步先沖埋涼先返工咁...

To be silent最後哩個我反而覺得當有返咁上下修為既時候並唔難做到；其實意思係指對於自己既練習日常所做既學習保持低調，少說話多做事，唔好周圍羅黎炫耀自己有幾犀利同埋隨便用法術搞咁多野多管閒事。

睇完解釋我諗相信都唔難明，只係哩d阿媽係女人既大道理永遠都係講既易過實際行動...
*有d版本係將will同dare調轉左，解釋既意思其實差唔多，只係大家用左唔同字表達；例如will既意願解作為意志力及持之以恆既信心，同dare解作為行出第一步實際行動既勇氣。

英文對於學習神秘學有幾重要？

好多時(但不是絕對)，我自己對於一個人係西方神秘學既修為可以有幾深都會睇佢既英文能力。而對於有d英文唔好又自認為自己既修行好好既人我內心會覺得有d冷嘲熱諷...講到哩到搞到好似好串咁。但其實良好既英文閱讀理解能力係真係好重要(當然精多幾種語言會仲加好)，因為傳統西方神秘學書籍既原文都唔會係中文，翻譯唔單止難，仲有翻譯左個市場會有幾多呢...

好似黃金黎明、卡巴拉、天使學、儀式魔法、地卜、赫密斯等等之類都係英文又或者其他外文，但一定唔會係中文，所以如果一個人同我講自己有幾叻但係又畀我發現英文水平好差既時候，佢學習既來源已經可以即時想像到有幾多同有d咩...

我其實自己細個既時候英文都唔係太好，都係因為接觸左塔羅牌開始進入西方神秘學領域反而有興趣同有原因去學好英文，跟住慢慢就培養出興趣同埋習慣左個語感，同埋逼自己睇，睇睇下由逐隻逐隻字譯，耐左慢慢就會變左可以隨手羅起本書就算唔係隻隻字明哂都會知講咩。

睇原著當然重要，另外一個好重要既原因係，當某d人係西方神秘學誇誇其談又或者d唔知點解淨係係港澳先流行既講法既時候，去搵搵d英文書如果完全無提過既話，可信程度有幾高可想而知，就好似曾經聽過有人話自己塔羅有幾犀利，已經去到用79張牌，準備會用第80張既時候...又或者，咩塔羅牌有牌靈、咩開牌儀式之類...其實認真睇睇西方原汁原味既書籍就會知道係傳統既神秘學世界無哩樣野(如果用塔羅牌黎施法係會有d事先要做既儀式，但唔會係某d中文塔羅書籍講既開牌儀式)，總之其實有好多野，係唔知點樣黎...

最後，西方神秘學亦都係一門學問，要有功底，都係要花心機、時間慢慢去學習同累積經驗，唔懶得。

邊到拜神最靈？

有時聽到有d人話返去邊d名廟拜神，又話邊到邊到好靈，有d拜開既又話起碼連續三年都要拜，總之有好多，其實拜神哩家野有冇需要好似爭名校咁要出名呢？

每次講起d大廟（包括大陸，香港定係澳門），我都只係諗起一樣野，就係「商業」。好多廟宇都好商業化、高價收入場費、收既香油錢又或者拜神買既香燭錢都係一流收費，至於拜完神之後得到既係咪一流功就...？我記得自己既老師有講過其實廟宇一旦商業化，個神就唔會坐係入面，雖然哩樣野無得考證，但我自己個人覺得幾有道理，當作為與神溝通或者接觸既地方一旦商業化同世俗化，就會變得同出面既舖頭，商業社會平時既生活有咩分別呢？實際上商業化既廟宇收到d錢都唔係去左個神到，而且神明亦都唔會需要因商業理由或者金錢而畀面，除非d錢扣哂日常開支之後用黎做哂善事就可能另作別論，但係哩個可能性有幾高呢？我都唔知，因為我唔係管廟既...但大家去拜神既話記得記得真係要搵d唔好商業化既廟宇，如果唔係真係哂氣。

之前有篇BLOG提過話其實人好多時都係好現實，去到真係拆唔掂先求神。雖然我唔係神，但係有副對聯我相信好能表達到神明對人類欲望既回應，唔...又係時候拋下書包啦，「降福豈能徇眾願，問心當不愧神明。」簡單d照字面解釋就係，實現願望又點可以個個人都可以畀你？你問心做既事同行為值得神明幫你先啦。呢對對聯係掛左係澳門城隍廟門口，大家有時間可以去睇下，其實諗落都幾有意思；講真，點解神明要幫你，又或者求神幫之前其實都要自己問下自己值唔值得個神幫。除左自己平時有無做善事之外，就係有無盡力做好自己；兩個例子，例如你求神保你平安大吉，諸事順利哩類既就好自然睇你有無做善事。如果你求工作順利，人緣好，但自己個人又成日發脾氣或者性格太自我既，就算有緣份畀你遇到好人、貴人，都會畀你嚇怕。再者，個神知你平時臭脾氣又或者工作懶散，佢都無mood幫你喇...

講左咁耐，好似叫人唔好拜神要靠自己，我自己有朋友聽完都問我咁其實係咪我研究神秘學都最終覺得做人都係要靠自己。以西方神秘學思維黎講，就算做左法術同儀式之後你既行動都要配合你既意願先會令到個法成功，你話如果做完法術求財之後淨係坐係到等人畀錢你既話哩個係no point，又或者咁講，法術同行動係相輔相乘，當然如果係召喚之類既大型魔法就係另一回事喇；不過哩個世界都有例外既，歷史上就有記載Aleister Crowley就係做完儀式之後將自己本身有既錢都用埋去飲酒，當然哩d傳奇人物就緊係過幾日就收到一筆佢足夠用既款項...有機會我研究到點做到之後再話畀大家聽，不過到時可能我已經雲遊四海唔寫BLOG了～哈哈！

最後老土d都講一句，要神明保你最重要唔係拜得神多，而係做個好人、多做好事善事，心存正念。

係最絕望的時候，你會求邊個？

雖然宗教係社會上佔有重要角色，但其實而家好少人有宗教信仰，例如個個星期日去教堂，又或者成日拜神（係我認識既圈子入面真係好少..）大家平時返工放工咁忙，好多人放左工都去happy hour，又或者訓覺；會拜神時候通常都係年尾年頭，又或者聖誕節子夜彌撒去教堂感受下氣氛，另外仲有一個時候，就係觀音開庫...

其實簡單d黎講，人都係比較現實，好多時真係有需要又或者感到無助既時候先會去求神拜佛，求神拜佛哩四個用得好多既字都唔係同你講阿彌陀佛講修行，而係好實際真係唔掂喎，乜都無哂計去到絕望時真係唯有求神幫，就當係最後既方法。係港澳社會比較普遍既都係天主教基督教、佛教又或者道教；其實邊個都好，大家都會有自己既目的或者想解決既煩惱，但通常一般都係選擇屋企人信開又或者感覺比較熟悉既宗教神祗，斷估係港澳社會無咩人覺得前途暗淡既時候係去搵太陽神阿波羅掛？

但係對於西方神秘學界既人，尤其係港澳地區既，係哩d情況選擇困難其實會比一般人會多少少，傳統西方神秘學係儀式上會搵既高靈又或者神祗本身都比較多，情況就好佛教入面有佛、有菩薩，道教又有好多唔同既神靈，不過其實呢個都無咩所謂，都係屬同一宗教入面。但有一d西方神秘學學派所包括既唔止一個宗教既神祗既時候，就會開始有哩d問題啦，就好似黃金黎明入面會接觸到天使而又會請埃及神祗咁。我有個同門既朋友佢係遇到問題時會搵埃及神祗入面既Thoth同Maat去解答又或者畀啟示，而我自己就偏向中意搵大天使，嚴格黎講我都仲未試過搵埃及神祗，唔...反正哩d都係個人喜好。不過以我經驗黎講，佢地對事身既睇法或者能量係可以好唔同。

好啦～講左咁耐，問題黎了，連我自己都思考緊未識答。上面頭先講緊既神祗同天使都會可以係同一個派別入面到出現，但打個比喻，如果此時此刻我身邊好重要既人突然發現身體有事，得返三四年命甚至可能仲短既時候，其實我自己都唔知會搵邊個，以自己所學所識既能力可以做西洋魔法儀式，搵Adonai、Shekinal、大天使之類...但係係顧忌自己做儀式可能會帶黎既業力問題時（因為就好似自己落指令去引導改變），可能會選擇祈禱；但另一方面，又其實可以簡單一d，唸觀音經、白衣神咒之類，尤其係對於我地哩d宗教背景可能稍為多元化又或者唔同方面既野都識既時候。

但其實最大既考量唔係邊個有效d，而係作為擁有多神信仰，即係相信世界上有天使，亦都會有精靈、菩薩唔同既高靈，你係信佢樣樣都有既時候就有時唔知搵邊個好（當然要錢我覺得自己唔會去搵財神..），就好像上面所講既例子，感覺無乜理由自己做儀式搵天使幫那個重要既人做儀式求佢健健康康，跟住轉個頭又去唸觀音經...我自己都覺得怪怪地咁...可能係我自己過唔到心理關口掛？

大家有咩意見歡迎發表下討論下哦～！

Whatapps - 令我們變得這麼近 那麼遠

Whatapps－唔駛講大家都知係咩既apps，而且仲令好多人又愛又恨，咩兩個剔剔、最後上線時間、又可以即時傳送埋咩位置之類。其實同以前既icq、msn比，除左上述因素外，佢既模式其實我覺得係令人與人之間既距離又近左又遠左，就正如題目所講既這麼近，又那麼遠。
點解近左相信大家日常生活已經完全體驗到，但點解又會話遠左呢？可能有d人會話：「唔係喎！由全天候24小時拎住個電話隨時都send到又收到message，又有埋最後上線時間，收唔收到同幾時睇到都無得走雞，邊有遠到？」「仲有得send相而又可以錄音連voice message都可以儲到一大埋添！幾時睇返都得。」

哩d全部都係事實，不過只限於同你好熟既朋友又或者情人，因為真係可以畀到大家不停咁傾；但其實有一樣野會係大家會係msn到做但又唔多會係Whatapps做，估下係乜？就係你唔會無啦啦去hi人，以前玩msn或者icq戈時見人地上線，就代表對方係得閒可以傾下計，又或者見到好耐無見既朋友會主動hi下，搵d野傾下又或者睇下對方哩排點；個感覺就好像咁岩係msn見到佢係到，自己又無野做有人上線咪搵佢傾下計。試過有幾次就係咁一d生疏左既朋友又變返有來往。

同樣地，大家會寧願係msn傾幾句或者主動問候下人而唔會無啦啦突登打電話去畀一個好耐無來往既朋友睇下佢點，總係好似有d怪怪地咁。普遍黎講用msn或者icq會聯絡d好耐無傾或者來往既人（早排興返一輪icq戈時開返就係），而Whatapps正正就係因為24小時都會搵到，又唔知對方做緊乜又係咪得閒，感覺就好似打電話咁，又唔會無啦啦特登搵人，變相反而將本來無乜來往或者生疏左既朋友更加少機會聯絡，拉得更遠。

溝通既模式同發展雖然係由人類自己發展出黎，但往往時代的潮流又逼住大家去接受，正如我自己個人覺得而家話完全唔用facebook、Whatapps，淨係用icq既話，顯然同現今既社會脫左截；而家交換既聯絡方式會係facebook同手提電話，你試下好似以前細個咁問人羅屋企電話，又或者交換icq。。。相信聽到既人會O哂咀，嘿嘿。大家可以下次識到新朋友戈時試下…^_^

其實大家對於自己既朋友，就算真係少來往，其實都可以唔駛覺得怪，主動d去多聯絡，畢竟做到朋友都係緣份，雖然現代社會個個生活都好忙，好多野做，但係好多事好多人，並唔係要到你得閒既時候先去珍貴。