每位占卜師都可能曾經有過的駐場經驗

駐場占卜呢四隻字對於好多占卜師相信都唔會太陌生，以我所知有唔少人開始佢地既占卜生涯都係機緣巧合，又或者有人問有冇興趣試下合作，然後業餘身份開始。畢竟好多人剛開始做占卜都係約出黎占比較多。

雖然我而家都係Part Time形式做占卜既工作，不過當年都係由係漁人碼頭做駐場開始，之後又試過係Magic Cafe，睇返記錄原來已經係成五年前。

點解會突然講起呢樣野因為最近有香港行家問起我有冇做過駐場占卜，效果點樣？我第一件事問佢既係咩餐廳咩場？因為其實就算有料都好，係咩場到做係超級直接影響個占卜師既名聲同印象（其實都算係廢話，不過大家聽到有人搵自己合作好似有錢搵既話，總係會個心郁左先既。。。）

然後戈位香港行家同我講話有酒吧傾過，一聽其實已經唔駛諗。因為本身識你或者有心想占卜既，唔會想去酒吧，去劈酒既又未必真係咁有心或者想占，先唔講環境太嘈影響到占卜師既狀態，個客自己飲到WING WING地，都未必諗得清自己想問咩。問完之後再飲酒，醉左就算係你真係占得準，都唔記得你講左D咩。

咁咩場先適合做駐場占卜呢？當然最好環境優雅，稍為有格調D同埋唔好太嘈啦；但係最重要都係有FEEL真係傾計傾心事既地方，成班姊妹淘吹水傾心事，旁邊有占卜師又可以幫手下自然係add bonus，成班女仔傾得熱鬧時聽到你問完我又想問，咁樣既效果好好多又多D機會表現占卜師自己，唔駛做路人甲。

你想我聽你講左先，定係乜都唔駛講直接抽牌呢？

早排接左一個Booking，客人好有心咁寄左封email畀我做回饋，好開心個客人係email到贊我(唔係Hard sell，佢真係贊的)；其實咁耐以黎真係第一次有客咁有心咁之後再聯絡我咁傾，因為平時通常都係口頭贊或者介紹朋友黎，而佢畀我既mail睇到既感覺好似人地外國好興戈D既Testimonial列返d客點樣贊咁擺出黎。

當然以下落黎唔係同大家分享佢點贊我啦。

哩位客人有同我提到同客人既溝通同埋覺得長期做一個塔羅師可能需要培養耐性好似兼做心理輔導咁；咁其實同客人既溝通當然自然會變相聽到客人講既好多野。有d占卜師覺得要照顧個客既感受陪佢傾下計，有d占卜師就覺得兩樣野係分開反而太多心理輔導會變左唔係占卜會唔太專業。

當然其實哩d係個人風格同埋取向，冇話邊樣好d或者岩定唔岩。

但係我自己有個考慮就係如果問得太多或者聽得太多，會好易感覺比人好似「套料」咁；唔同既占卜師有唔同風格，自然唔同既客人都有唔同既口味。有d人會好似我哩位客人咁可能想多少少既交通或者占卜師畀多少少耐性；但有d人唔係咁諗嫁喎，會覺得，「而家我畀錢你緊係我聽你講，唔係你聽我講囉。你知我咁多野都係套料姐，陣間照住講返差唔多既野就得啦。你有冇料到嫁？」

作為占卜師其實我都幾避忌哩樣野，所以搵我占過既客人都會知道，我唔會點問個客人問題，頂多係抽牌問愛情既時候問佢而家有冇對象，有既就諗住佢抽啦。而我唔識你，你又唔識我，我又冇問你d乜既情況下講中個客既現況，咁佢再抽牌問之後既事其實佢會放心d又或者信心大d，相對成個過程又會流暢d。

因為有d情況或者問題，係真係好易比人感覺你聽我講左我d野你實咁講啦。

試過有位即將畢業既大學生問牌占卜，想問事業如果發展一樣新既範疇，由頭開始讀多個學位做戈行既前景會點。得出結果既意思係哩種工作係好煩而且實際無想像中咁好，錢就肯定搵唔到話特別富裕，最大問題係會嚴重影響自己精神狀態甚至會影響到私人生活或者用埋自己私人生活時間黎做野。

之後佢講返原來佢想讀多個學位係做社工，咁我就明哂點解會占到咁既結果。試諗下如果我知道佢想做社工讀多個學位前景點，如果我咁講就好似因為佢講左係社工我先咁講。

不過最後當然到最後其實我覺得睇返個客人想要點樣既方式同埋係咩情況，其實唔同既方式我都無問題，不過其實既然有客人係中意咁樣多d，我都應該要考慮下點樣去處理同客人溝通既方式了。

自己動手剪牌...

 

相信很多有玩牌既朋友們都見過一般既牌都有白邊，最近係網上見到有D外國既既Blogger將副牌去哂白邊，感覺頓時靚左好多，畀我既感覺好似比較古典同埋接近睇電影情節用既牌。

 

結果忍唔住就自己試下切，而我就選擇左新買既Lenormand占卜牌，因為得三十六張，切起上黎數量少D、壓力少D、又易D。另外亦因為Lenormand其實唔需要太睇到佢牌入面既內容，唔同塔羅一張牌可以有好豐富既圖象意思，所以切都無所謂；而且細副D，攜帶方便，有時出街唔帶袋都可以裝到係褲袋到...相信有搵過我占卜既客人都會見過我拎個細細個類似行李箱既盒又或者大袋，其實有時都幾唔方便。

 

某程度上其實都係方便我出街戈時懶左。

 

不過到底係點CUT呢，其實都係好似平時影相舖切相戈樣工具咁，大家睇相可以見到。就咁四邊切哂，切完之後再用閘角器令個角變圓（呢個步驟緊要的，如果尖角會「吉」手同埋好快會披口，變得唔耐用。）。

 

所需用具一般文具店有售，夾埋哂應該兩百蚊有找，大家有興趣可以玩下。不過除非你功力好好，如果唔係切出黎點都會有D唔齊，唔同印刷廠咁。但用起上黎其實冇問題，當然唔好太誇張真係差超多啦，其實講真，以前既牌應該都唔會好似而家我地用既咁齊掛。。。？

 

最後請放心，切左唔會有D咩話會邪或者會影響占卜效果。但如果你副牌係好貴或者好難搵返既就最好唔好做呢樣野啦...

近期的劇情都很相似

經常成日都話幫人占卜就好似睇黎問卜既客人最近既一兩頁劇情好似睇小說咁，而最近睇左幾位客人都係類似劇情咁，有少少驚驚地係連身邊都有朋友係類似情況，有時都搞唔清係自己睇得太多盲目左，定其實真係咁岩得咁橋某幾位客人都係近似情況呢？

但願係後者啦，如果唔係既話我都應該差唔多可以去出家。。。哈哈。當然做唔到，我好中意食刺身的~_~

其實相似既地方相信好多人都經歷過，都係放唔低之前既感情，又或者一直都用過去既回憶去原諒地方，然而其實回憶都應該會用盡。有D事改變左，又或者對方變左心，然後自己死求難求，無哂尊嚴咁謙卑屈膝又點呢；當自己要做到咁去乞求對方既憐愛既關係早已變質，再求再纏繞，逝去感情仍然留不住；執著只會成為枷鎖同咀咒令自己原地踏步。

誰知道下一個唔會更好呢？Come on！飲杯忘情水，瀟灑D放開執著搵個新既啦！

終於整返張卡片

新既卡片終於印製好了，係哩到真係要特別多謝幫我設計既朋友。

相信有D襯過既又心水清巴客人都會諗到「卡片？好似唔見你有派過卡片喎～」的確，其實對上一次印製既卡片係好耐好耐之前已經派哂出街，而後來又點解無翻印呢？當然係因為有部份既資料已經唔Update，而且其實張圖有D問題，因為當年係搏搏地既情況下用左一張象素唔夠高既圖...

之後一直戈位朋友都忙，約左幾次都約唔到時間坐低傾傾新既樣式；到後來有兩次有約到時間見面傾同再諗，但係就卡住左係個設計問題到，因為當時新諗到既設計就係差一張岩心水既圖，結果拖下拖下又一段時間。

而早排又發覺多左機會派卡片，所以再約佢傾傾，咁岩搵佢既時候佢又好得閒（可能真係整定...哈哈）。隔左一段時間，今次大家個腦都無咁實，亦都有新既靈感，將神秘學符文打斜黎擺係背面，正面用左一個含有神秘學意思既圖案做主要形象，其他就玩字型同簡潔風格，自己覺得其實好似有D日系風格。

不過其實最大膽既我覺得係將所有有提供既服務全部刪走哂，只係係個名下面寫返低「占卜師」三個字，感覺好似型D COOL D，哈哈。因為黎緊都會用埋其他既占卜術黎解決客人既需要，下面Facebook戈到都寫左係澳門塔羅占卜社，反正一睇張卡片都應該知道係西洋占卜術。

至於如果其他仲有D咩？就要等有緣人有需要既時候問到先啦～反正其實卡片既設計，再加上「占卜師」三個字，已經好足夠去表達係D咩黎了。

哩輪天氣好舒服，成日都想訓覺，晚安。

占卜時朋友的作用

一般問塔羅牌好多時都係問卜者自己黎問，雖然有d客人都會帶朋友一齊黎聽，但係以我經驗都會比較少，當然可能有開實體店既行家可能情況會唔同。早陣子有兩位客人一齊黎搵我問牌，令我體會到又或者被提醒左「順便」帶多個朋友既用途。

其實好多人都會，當自己坐到係占卜師面前想問問題，聽完占卜師解完牌之後同自己所想既唔同，又或者有d人其實係想聽到自己想聽既野，又聽唔到既時候，有d人就會變得迷惘又或者有意無意選擇性地記得自己中意既野；當然身邊既另一位朋友因為其實發生既事係唔關自己事既時候，就會變得好有邏輯同斷判能力，亦都頓時變得溝通能力爆燈。

而今次兩位客人到自己問既時候要諗問題又或者聽完之後都有d愕然或者混亂，又話自己問哩d問題係咪好似好傻，而唔係占卜緊既另外一位就會突然變得好清晰，仲會提返自己個朋友想問既問題占卜師已經解答左你，突然一句「岩先你咪問左囉！」又或者「拿～佢既意思咪姐係......佢講得好清楚啦。」就好似變左係我既助教解讀員咁犀利。

其實朋友係占卜過程可以擔當幫手總結又或者記住d問卜者唔想記又或者唔記得既野，亦都可以幫手諗問題，通常問卜者諗唔到問咩既時候，身邊既朋友總係可以提出好有建設性既問題；但係當身邊既朋友成為問卜者坐係占卜師前面想問野既時候又頓時靜左。。。

而當時其中一位客人到最後都話自己好迷惘好唔想放低，占完成個鐘之後都唔記得占左d咩，淨係記得個男朋友冇第二個女人。我同佢講唔駛擔心，成個過程錄哂音有哂紀錄，之後你返到屋企日聽夜聽都得（當然我諗佢應該唔會日聽夜聽既），不過好在佢有個朋友陪佢黎問睇哂成個過程，如果唔係佢同人講返都好神秘...問左成粒鐘只係記得一兩個問題既答案，唔知既話好似我用迷煙迷左人又或者做左d唔知咩令佢乜都唔記得咁~_~

不過講到尾，其實每個人對於自己著緊同上心既事就會咁，包括自己作為占卜師都會有煩惱同有情緒既時候，差在大家點樣去平靜自己同選擇用咩態度去面對，見得多呢類型既客人就更加提醒自己對於任何既問題或者不安既時候都要處之泰然從容面對，如果唔係處理得唔好就只會衍生到更加多既問題同影響到自己生活其他方面。

ABC君原來係佢...

上次講起占卜私隱既問題，提到有一次無意中知道有關朋友既事，諗返起有少少無言（原本想話尷尬，但諗落又唔關我事。）

事緣係朋友介紹左個客人搵我占卜，問卜者當然亦係例牌既妙齡女子問感情。正如朝早起身刷牙洗面例牌工作一樣，首先洗牌切牌開扇再叫那位女子抽牌先開整體運勢然後再抽牌細問。接住佢就係問有關同有可能發展對象既前景、對方點睇、遇到d咩阻力、佢身邊d人點睇大家既發展等等之類都會好多人問既問題。

講到哩到相信有好多搵過小弟占過愛情既客人都應該會記得問到涉及的對象們既時候（有d人係會同一時間有超過三位對象的。），小弟都會叫來客諗住ABC君，A係邊個、B係邊個、C係邊個，係個心諗住唔駛講我聽，但就自己要記得邊個係邊個。而戈時我又冇特登同佢咁講到，結果佢就講左個名出黎，點知係我識得的（假設叫Kelvin，事實當然唔係哩個名）...因為個名係比較特別，跟住介紹客人畀我既朋友亦叉多句埋黎，「係呀！係你識戈個呀。」，結果頭先提過戈d同對方會點、人地點睇自己、佢會唔會中意我既問題就變相全部變哂係Kelvin點睇我、我同Kelvin會點、Kelvin....#$%@$^$%、Kelvin...$%!$**%%#

Er...感覺有d奇怪，雖然唔關我事我亦都唔會講出去，但貿貿然知道左人地d私事，又唔係當時人講我聽，個心仲係有d唔知點。不過亦好彩我個A君朋友亦係正經人家，冇乜特別驚嚇既牌，個客人亦都冇話對佢做左d咩事；因為試過有d客遇到既真係世紀大賤男，如果因為客人黎占卜而知道自己朋友d衰野就...就真係其實唔知好過知。

所以此後，小弟就叫客人諗ABC君就唔好講名了，但係唔該真係自己要記得占卜當時所諗既ABC君係邊個，錄音唔會有講到名的。

最後，戈次就話係朋友姐，萬一...如果將來有一次，個客直接講個名出黎之後，「嘩！哩個咪我老豆個名？」咁就真係唔知點算好了....-__-|||

都係唔好問啦…

可能因為小弟正職係做銀行既關係，對於私隱哩d野會多少少考量，又或者因為我自己對自己既私隱都會幾在意；正所謂「己所不欲，勿施於人。」，我諗可能有d朋友又或者客人都會留意到問到相關問題時我都會幾猶疑（其實係叫你都係唔好問啦…），因為我自己本住既心態係令到問卜者清晰了解返圍繞自己既客觀情況之後等佢自己做返決定。
 

熱門既問題通常有：

「我個前度男友同佢而家個女友點？佢地感情有冇問題？」

「我想知我戈兩個同事咩關係？佢地對雙方之間點睇？」

……通常都係執著於前度既事、想法又或者八卦人地既野多。

不過係咪真係一條都唔答得或者唔問得呢？最怕既係答完之後開左個頭之後就會忍唔住不停咁想問落去，又或者有種點解之前問得又或者人地問得，而家又唔得既感覺。再者咁樣執著地問落去，以我既經驗，通常係令到問卜者思緒混亂多過真係了解自己既內在從而解決自己既問題。又或者咁講，換著係自己都唔希望人地走去問塔羅牌黎自己既私隱。

所以，都係唔好問啦…

回歸原點，其實黎問塔羅占卜係為咩呢？雖然岩先講到好似好嚴重咁，當然，可以當娛樂或者純粹聽下亦都可以無乜所謂啦，只係切忌沉迷。但係至於能力範疇睇唔睇到哩d咁私隱或者更深入既問題呢？其實係可以既…做占卜哩行，亦都有我地自己既「行政優勢」。

今日講到哩到，下次再講下無意中因客人而知道左朋友既私事…

強國許願法

 

唔知道岳飛泉下有知會點諗？

 

清明節既時候連住羅左幾日假自己一個去左杭州旅行，去到當然係周圍行下睇下景點，其中去到岳飛墓時見到呢個香爐真係呆一呆...清明時節雨紛紛當然戈排有雨落，但就真係唔知平時個香爐係咪裝滿水呢？當然我明白落雨既話就緊係有積水係到好正常啦。最呆既係入面有不少人民幣，紙幣硬幣都有...我相信應該不少人都會估到佢地係當許願池既概念，我仲見到有人羅個硬幣合十默唸完再擲落去，跟住紙幣都仲有，難道除左燒之後仲興用水？變唔到灰嫁喎...

我心諗，我國同胞清明拜祭方式日新月異、中西合壁、簡約方便....Anyway，惡搞完。似乎有部份人都真係缺乏邏輯先會咁做。其實岳飛唔會收到大家既人仔亦都唔會識得幫大家實現願望定保平安啦...

扔銀仔呢個方式其實係源自西方意大利羅馬既許願池，方法背住個池然後用右手向後扔（要係要飛過左邊膊頭上方）然後轉返身睇到佢跌落池到的，而且唔止扔一次，因為傳統上第一個願望係要許可以再次黎羅馬，之後再許既願先成功，亦都有話第二同第三個願望分別係要遇到中意既人同埋同中意既人可以共同一齊黎到許願池。版本有唔同但大致既都差唔多。

其實感覺有d似係扔許願帖上寶樹到，先不論羅馬既靈唔靈驗，但係將扔銀仔落水到許願哩個動作搬黎中國到周圍用就肯定唔會有效...就算少少，倒不如用黎幫助有需要既人，積多點功德，也許會變得更有意思。

蛇年開爐

小弟由於最緊都幾忙，所以少左更新，黎緊會更新得密D =]。點都好，新一年新開始係到同各位讀書拜年，祝大家黎緊新一年身體健康、萬事勝意、賺多D做少D、愛情事業樣樣都如意。講完拜年說話之後都同大家分享一句我經常都提自己既話，就係咩時候都好，都要活好自己既人生。人生條路既大方向可能天生已經生出，但係點樣去行面前既路同用咩態度面對，就絕對係大家自由意志去選擇。

今個新年做寫字樓既大多數都係放到星期三，幸好小弟老闆皇恩浩蕩畀我羅多兩日假放到星期一；拜年活動之後可以休息下仲可以多幾日睇下書。

同門相聚

 

話說剛剛過去的星期日，我自己一個過左香港同兩位都係黃金黎明學派既朋友一齊聚下、溫下習，雖然最後變相似吹水多...不過同門相聚見下面，大家交流下心得其實都係一件好事，起碼感覺無咁悶，同埋動力會大d，講真有時自己一個日練夜練其實有時都覺得有枯燥。我諗應該好多學左有咁上下資歷既朋友都應該會明白。

當然話就話好多時間吹左水，但其實大家都有帶書同自己既筆記出黎。係大家討論同埋一問一答既情況下相對平時自己睇書亦覺得有趣好多，更重要既係大家言語之間傾計討論黎複習既話亦都易d入腦，而且好肯定一樣野就係唔會好似睇書咁唔夠精神會恰眼訓XD

而家暫定大約每兩個月就出黎聚一次，期待下次聚會。

閒談占卜紀錄

記得以前細個讀中史既時候，中國最早發現既文字寫於甲骨上故名為甲骨文，係殷商時代既產品，最當時既用途係用黎記錄占卜結果；因為當時既占卜係燒龜殼燒到佢有d裂紋爆開然後再按照龜殼上面既裂紋黎判斷吉凶(好似有d係會用骨)，講到呢到我不禁諗起如果下下都要殺龜燒殼都幾慘下...

當然唔駛幾耐大家都已經識得係竹上面刻字做紀錄跟住後來去到有紙有印刷，去到而家甚至用電腦用個Word檔就已經可以。以我自己睇法黎講，占卜紀錄當然有用，我自己都建議每個學習占卜既人都將自己占出黎既結果記低，咁樣就可以係事情發展一段時間之後睇返就可以知道自己當時解牌得出既結果同實際情況既比較，又或者可以睇到原來有d野係牌面上顯示左出黎而當時未解到，之後睇返就會明白當時點解會抽到戈幾隻牌。久而久之哩d經驗就會成為功力既一部份，始終除左睇書、理解牌義、符號既意思同埋係神秘學上既對應之外，可以好實際咁應用到出黎都係好緊要。

另外一個原因係從實用角度出發，以我既經驗通常大家係占卜完左之後一兩日已經將好多占卜既內容忘記左，除非係d好指明又或者好斬釘截鐵既答案，例如佢有第三者、邊個月有拖拍，有冇得升職之類。但去到例如點樣點樣做或者改善、或者一連埋串睇黎緊幾個月每個月既戀愛運、有咩阻力哩d比較詳盡d既答案既時候通常d客人都會好多都記唔到或者好快唔記得；其實自己幫自己占有時都會有咁既情況，此時如果有份紀錄係到就可以睇返提醒返有d問題要點處理又或者去到邊個月份戈時要注意d乜等等。

亦都係因為咁既原因，我自己幫客人占卜之後都會附返上錄音檔同埋文字概括既紀錄，實際上係有幫助的。如果唔係就算占完之後你問返我戈時講左d咩，其實我都唔會記得...因為客人既私隱根本唔可以講出去，所以記黎都無意思，一般都會好快就唔記得嫁啦；除非係d好特別好特別既例子同情況啦.....嘿嘿！

*請留意由2013年9月1起已經唔再提供文字紀錄啦...

English...OK? English, OK.

早兩日係機緣巧合情況下朋友搭朋友咁幫一位日本姐姐仔用塔羅牌占卜，見佢本身有點愁眉苦臉，似乎有心結解不開咁；到佢開口講出想要占卜既事情時我心諗「哦！咁咋麻～」，有d出奇地佢問既問題並唔係港澳女生們的例牌菜。可能來自唔同地方既關係，又或者戈位姐姐特別d啦？不過佢問既問題都唔太複雜，自自然然答既野亦都好簡單。

其實除左平時幫香港澳門人占過，台灣人、內地人、印度人既問卜者都遇過，基本上都無乜太大問題，當然比較之下實會係廣東話會最流暢嫁啦，國語都掌握到，英文都還可以，畢竟學牌睇既書都係英文，最多要Load下先講到出黎。但日本人麻...

我同佢講：「I think I need translation...Or,えごではいですか？（英文可以嗎？）」
佢微微嘴笑住用帶住強烈日文腔既口音答返我：「English, ok.」
我心諗，得唔得嫁？不過反正都唔係問d好難既問題，我慢慢答啦。

最後，幸好那位日本姐姐仔既英文聆聽能力都總算聽得明我講咩，但係就真係要諗一諗用日文腔黎發英文音仲要逐個逐個單字吐出黎，同平時慣左一揭牌就即刻開口講既感覺好唔同，窒住窒住咁...

我自小的魔法師志願

最近有個非常要好既朋友達成左佢細個一路以黎既夢想，就係成為機師係香港既機場駕駛住飛機升降，呢幾日佢終於佢達成到仲影左好多相畀我睇，身為佢朋友當然替佢咁感到高興啦，佢亦都好開心好激動咁同我分享佢既感受有幾大、有幾感動。講真，可以一路堅持不畏風雨咁追隨自己既夢想係好難得，可以成功做到就更加難得，所以對佢既堅持我真係由心地佩服，唔知道有緣睇到哩到既朋友們，你地又有幾多人係堅定不移既道路上追求自己既夢想呢？

當佢好開心咁同我講既時候，其實都有令我反思返自己既志願，到底其實自己係想點？諗返起細個（大約四歲到）既志願，其實係真係做一個魔法師。聽落去其實好好笑吧？相信而家既大人如果聽到一個小朋友想做魔法師的話，都會係覺得「哩個靚仔睇得太多電視打得太多機啦...」；當然當其時既我的而且確係發緊夢啦，未聽過塔羅牌、什麼符咒法術，更加唔好講咩黃金黎明、Witchcraft、卡巴拉、天使學之類，只係當時覺得「魔法師」哩樣野好型好正咁。不過，對於靈異事物同埋科學解釋唔到既超自然事物，的確係自小已經有興趣，可能係出自於對世界既好奇掛？反正哩d野，都冇點解。

係去到後來大約中二、三到就開始真正接觸到我頭先講既專業名詞，「嘩！原來真係有魔法。」，當然深入了解左之後又發現係另一個世界，又有幸地認識到自己既啟蒙老師，發現同想像中既野又好唔同，但係又真係開展左自己既眼光同埋思維，於是就開始追求了。而哩類型既興趣同占卜算命既行業，係陳振聰件事爆出黎之前，已經好多時畀人感覺呃神騙鬼、難登大雅之堂。而我唔信哩d野既父母當然唔多中意我接觸哩方面既野，覺得無聊哂時間，但好在都無點太大阻止，始終我讀書無問題順順利利畢業然後而家做緊份銀行工就OK；試下如果我話要辭職潛心鑽研，可能佢會羅住把刀押我返工好似押赴刑場咁(講笑)。事實上，話辭左份工去潛心修行、不食人間煙火，自問無咁既慧根去到哩個地步；靠呢行搵飯食現階段亦不太實際。當然，自己希望有一日係哩方面會學有所成去到超高手境界，而家亦只得靠自己慢慢繼續努力。

不過講真，有幾多人既夢想係真係好實際呢？可能大家會聽到有人想嫁入豪門、有人想買野唔駛睇價錢、有人想考到CFA / CPA做金融才俊；係哩個拜金主義社會，其實又有幾多人會知道自己個心係想做咩先開心，又或者記得自己細個既志願又去努力實行緊呢？做緊會計師、財務分析師既、係投行每個月抖緊超過十皮、每日為英美股東搏殺既金融才俊美女，又或者近d，係澳門賭場搵到好多錢既人，其實有幾多小時候既志願係想做哩d呢？定係其實都只係「打份工姐」既心態呢？

我都唔知...但如果一個小朋友，唔好話幾歲，就算有十二三歲既，同我講佢志願係四大到做會計師（會計界既朋友請恕我覺得會計好悶同好似無乜工作上既滿足感）又或者話做投資銀行搵大錢既話，我會覺得好恐怖，同埋好懷疑到底佢真係真心想做，只係父母親戚不斷灌輸佢哩行實搵到工搵到錢又穩定又係專業人仕既結果。當哩種風氣愈來愈強，愈黎愈年輕化既時候，我地既社會會變成點呢？可能大家都會放棄做d似乎唔可能，但又可能其實令人生好精彩、令自己好滿足既事吧。

我個好朋友佢細個話想做機師時都有受過人地既冷言冷語，覺得讀學渣飛機出路太少，又好難，唔會成功之類；然而佢而家就真係成功，仲好享受自己既生活。其實講到底，都係要自己堅持，有時都要反問返自己一句，到底自己既堅持又有幾多呢？

祝願大家　初心恆在

facebook專頁 - 澳門塔羅占卜社

小弟剛剛哩幾日整個facebook專頁叫澳門塔羅占卜社，故名思意當然係同塔羅牌占卜有關啦，會分享下塔羅牌同埋西方神秘學資訊，順便都用黎宣傳下。順便既係想宣傳返d正統既西方神秘學知識。

至於詳細分享d咩都仲計劃緊，但估計應該會輕鬆d無呢到講既野咁嚴肅既。

澳門塔羅占卜社
https://www.facebook.com/macautarot

三十網路電台Live

好耐都無係澳門既網路電台到做節目啦，而且仲要係做嘉賓，諗返起今次都好似係第一次做嘉賓講塔羅牌。今次難得Issac邀請，又知佢一直都好畀心機搞緊三十行動，當然要支持下啦。

今次節目其實都係大家傾下計，講d比較入門既野...

http://www.youtube.com/watch?v=UcgcLqj5WqM&feature=plcp

探索拜火教墓地

在澳門的東望洋山附近的 白頭馬路，有一座充滿神秘感的波斯拜火教（瑣羅亞斯德教）墓地，大約有近兩百年的歷史，但現在已經是重門深鎖...

就在12月8日那天，由於有一位香港同行的朋友過來澳門，加上之前一直都有跟她談論過澳門的拜火教墓，難得過來澳門，所以那天我們就一起去了拜火教墓探索一下（要爬進去的...），看看那些石棺與上面的文字；當然我們不太清楚拜火教墓的歷史，實際上有關拜火教墓的資料也少得可憐，相信做過資料搜集的朋友會知道。不過，即使什麼都不知道也好，有一點還是能確認和感受的，就是墓地內的氣場和能量。

因為拜火教徒的落葬方式是選用天莽，墓地內的石棺是沒有屍骸，可能跟沒有太多的光線射進去的關係又或者曾經做過一些儀式，墓園內的能量很強，亦很不友善；當然這個是私人墓地不是對外開放，所以入面的能量又或者靈體不習慣外來者的騷擾是正常的，但只是強度和「凶悍」度比想像中強得多，所以當踏入墓園時已經心中唸唸有詞打聲招呼表示慕名而來參觀一下，然後還有的是唸咒保護自己...

整個過程其實我只是慢慢看看，但我那位朋友Ａ小姐就相對地活躍周圍逛，當中過程其實沒有做什麼特別事，我們主要都是看看石棺與石碑上的文字。然後到了差不多離開動身回頭時，突然一大風，整個墓園內的樹都比風吹到「沙沙」聲，然後我那位朋友突然「哎呀！」一聲，原來是被樹上跌下來的果實打到右眼眼角，於是便更快急急腳地走了...果然真的夠凶...

當然，聽上去可能會覺得只是剛好巧合而且，不用大驚小怪自己嚇自己。但細心一想，也不能完全排除是墓園內的能量或靈體示意想我們走。

註：由於當日不想冒犯，所以大家看到的照片都是我從網上找來的。

塔羅慈善籌款 - 汎澳青年商會 Nothing But Nets 為生命轉帳

做了占卜師那麼久都是第一次用塔羅牌占卜來作慈善籌款，雖然真的很累，去到十一點多，還有些已報了名的會友還沒來得及問牌要留待下次...可能下一次又會累積一些人到又再下一次再能問吧，如果我的生意有這麼好就好了～嘿嘿！
話說回來最近幾個月開始有參與汎澳青年商會的活動及幫忙做活動的籌備委員會，而剛好這次籌款項目我也是當中的籌委會成員之一，所以就於七月月會的聚餐當中設置一張枱進行塔羅牌慈善籌款，而所得的款項都是捐到非洲為防止瘧疾。
這個慈善活動名字叫Nothing But Nets，在澳門翻譯成 - 為生命轉「帳」。這其實是國際青年商會與聯合國基金會攜手合作進行的全球性活動，即全球世界各地的青年商會都會為這個活動進行籌款，而所籌得的款項是為非洲防止瘧疾傳播(平均每30秒就有一個孩童死於瘧疾)；方法是以特製的蚊帳為非洲的人預防瘧疾，傳播率更可減低50%，詳細大家可以在網上會找到很多的資料。
起初開始的時候大家的反應都不太踴躍，可能因為大家還未察覺到吧。到了後來有點人再慢慢到有人輪候，結果完結時間比我想像中遲，一共有24個人問牌捐錢，到了十一點半才離場，第二天三十一號還是創業比賽計劃書的截止日期呢......不過既是做善事，而且看到大家的反應和所籌到的款項都不錯其實覺得還是蠻高興的。

有時候我在想...其實自己可以為這個世界貢獻有幾多呢？

新的工作 - Magic Cafe

雖然一直都有接塔羅牌的預約，不過都是在公眾地方，多數都是在咖啡店，最近的改變算是一個新開始，就是在高士德的Magic Cafe作駐場占卜，時間是逢星期二晚上八時至十一時半左右。但如果有緣的話，星期三的晚上都或許會見到我的出現。消費滿三百元即送一條三張牌的問題、五百元兩條及七百元三條；不過今個月剛剛推出，為了宣傳，即使不夠三百元消費也會送一條問題；如果想再問深一些就按照平時的收費了。

好，宣傳完畢......

猶記得當初學習占卜時是純粹為興趣，並沒有打算以占卜作為工作的一部份，後來機緣下有位跟漁人碼頭有合作的朋友叫我在他們節日活動中嘗試擺帳幕幫人占卜才正式開始占卜工作的道路，嘗試幫陌生人占卜。輾轉後來舊客的光顧，朋友、熟客的介紹才慢慢累積客人；結果幫別人占卜多了，自己的在塔羅牌的練習時間也轉移到神秘學的研究上面。

過去曾經有一段時間很想在餐廳做駐場占卜師，可以賺錢之餘又可以話不同的客人聊天，了解多一點這世上其他的人生，反正就是喜歡那種有緣的感覺；雖然我之前未曾試過這樣的工作。到了後來再後來，我也漸漸忘記了曾經有過這樣的想法，畢竟現實環境總是有太多太多的事要去做要去計劃；直到數個月前與Magic Cafe的Stanley討論有關這樣的合作時，才回想起當初的暇想。

不過怎樣也好，能把興趣成為技能好好發揮還是一件蠻能令人感到滿足的事，除了滿足感外，更多了份令自己不斷求進步的推動力；如果有自己熱愛的興趣，要記得好好堅持下去，只要自己不放棄就不會有人能令你放棄。