自己動手剪牌...

 

相信很多有玩牌既朋友們都見過一般既牌都有白邊，最近係網上見到有D外國既既Blogger將副牌去哂白邊，感覺頓時靚左好多，畀我既感覺好似比較古典同埋接近睇電影情節用既牌。

 

結果忍唔住就自己試下切，而我就選擇左新買既Lenormand占卜牌，因為得三十六張，切起上黎數量少D、壓力少D、又易D。另外亦因為Lenormand其實唔需要太睇到佢牌入面既內容，唔同塔羅一張牌可以有好豐富既圖象意思，所以切都無所謂；而且細副D，攜帶方便，有時出街唔帶袋都可以裝到係褲袋到...相信有搵過我占卜既客人都會見過我拎個細細個類似行李箱既盒又或者大袋，其實有時都幾唔方便。

 

某程度上其實都係方便我出街戈時懶左。

 

不過到底係點CUT呢，其實都係好似平時影相舖切相戈樣工具咁，大家睇相可以見到。就咁四邊切哂，切完之後再用閘角器令個角變圓（呢個步驟緊要的，如果尖角會「吉」手同埋好快會披口，變得唔耐用。）。

 

所需用具一般文具店有售，夾埋哂應該兩百蚊有找，大家有興趣可以玩下。不過除非你功力好好，如果唔係切出黎點都會有D唔齊，唔同印刷廠咁。但用起上黎其實冇問題，當然唔好太誇張真係差超多啦，其實講真，以前既牌應該都唔會好似而家我地用既咁齊掛。。。？

 

最後請放心，切左唔會有D咩話會邪或者會影響占卜效果。但如果你副牌係好貴或者好難搵返既就最好唔好做呢樣野啦...

近期的劇情都很相似

經常成日都話幫人占卜就好似睇黎問卜既客人最近既一兩頁劇情好似睇小說咁，而最近睇左幾位客人都係類似劇情咁，有少少驚驚地係連身邊都有朋友係類似情況，有時都搞唔清係自己睇得太多盲目左，定其實真係咁岩得咁橋某幾位客人都係近似情況呢？

但願係後者啦，如果唔係既話我都應該差唔多可以去出家。。。哈哈。當然做唔到，我好中意食刺身的~_~

其實相似既地方相信好多人都經歷過，都係放唔低之前既感情，又或者一直都用過去既回憶去原諒地方，然而其實回憶都應該會用盡。有D事改變左，又或者對方變左心，然後自己死求難求，無哂尊嚴咁謙卑屈膝又點呢；當自己要做到咁去乞求對方既憐愛既關係早已變質，再求再纏繞，逝去感情仍然留不住；執著只會成為枷鎖同咀咒令自己原地踏步。

誰知道下一個唔會更好呢？Come on！飲杯忘情水，瀟灑D放開執著搵個新既啦！

終於整返張卡片

新既卡片終於印製好了，係哩到真係要特別多謝幫我設計既朋友。

相信有D襯過既又心水清巴客人都會諗到「卡片？好似唔見你有派過卡片喎～」的確，其實對上一次印製既卡片係好耐好耐之前已經派哂出街，而後來又點解無翻印呢？當然係因為有部份既資料已經唔Update，而且其實張圖有D問題，因為當年係搏搏地既情況下用左一張象素唔夠高既圖...

之後一直戈位朋友都忙，約左幾次都約唔到時間坐低傾傾新既樣式；到後來有兩次有約到時間見面傾同再諗，但係就卡住左係個設計問題到，因為當時新諗到既設計就係差一張岩心水既圖，結果拖下拖下又一段時間。

而早排又發覺多左機會派卡片，所以再約佢傾傾，咁岩搵佢既時候佢又好得閒（可能真係整定...哈哈）。隔左一段時間，今次大家個腦都無咁實，亦都有新既靈感，將神秘學符文打斜黎擺係背面，正面用左一個含有神秘學意思既圖案做主要形象，其他就玩字型同簡潔風格，自己覺得其實好似有D日系風格。

不過其實最大膽既我覺得係將所有有提供既服務全部刪走哂，只係係個名下面寫返低「占卜師」三個字，感覺好似型D COOL D，哈哈。因為黎緊都會用埋其他既占卜術黎解決客人既需要，下面Facebook戈到都寫左係澳門塔羅占卜社，反正一睇張卡片都應該知道係西洋占卜術。

至於如果其他仲有D咩？就要等有緣人有需要既時候問到先啦～反正其實卡片既設計，再加上「占卜師」三個字，已經好足夠去表達係D咩黎了。

哩輪天氣好舒服，成日都想訓覺，晚安。

史上最出名同最賺錢既占卜師Marie Ann Lenormand

上次提到除左塔羅牌其實仲有其他紙牌既占卜術，效果亦都更趨向於電影橋段既作用。當然首先講哩種占卜術之前首先同大家分享下佢既背景同當時人相信會令大家更感興趣，本身用哩種占卜術既人係一個傳奇人物，甚至稱得上最出名既紙牌占卜師，而又因為佢其實亦都無乜後手既資料或者學術留低落黎，故為佢既成功更添一份神秘感。哩個人就係Marie Ann Lenormand。

其實我對佢既占卜方法感到興趣其中一個原因就係佢既名氣，咁到底佢有幾勁呢？佢係一個大概係兩百年前既法國占卜師，當然出名既占卜師當然係勁料同埋占得好準，準到拿破崙個個老婆Josephine成日都會搵佢占卜同埋尋求解決問題既方法，甚至當時俄國既沙皇亞歷山大一世都有搵佢占卜。所以以佢當時服侍咁多名流同達官貴人黎講，好自然名氣會相當大，有可能好似香港既蔡伯勵咁；亦都係因為哩個原因，雖然當時黎講占卜並唔係正經既野，係犯法，所以佢都坐過好幾次監，但無一次係坐得耐，因為...太多名流等住搵佢占啦。

至於佢點出名又點上位呢？以我大概搵到既資料其實係早係Josephine識到拿破崙之前，Lenormand已經有幫佢占卜過，指出將來會做皇后，佢老公亦都會好犀利。到後來佢所講既野都一一實現時，好自然Josephine就會諗起哩位占卜師，有咩事都會經常搵佢。

淨係聽故事已經夠哂吸引，我初初都諗住佢會唔會有咩技術或者神秘學研究留返低呢，而佢雖然寫過好多書，但有好多有關學術上既係佢死左之後被燒毀，所以留低既好少；而亦都有記載當時佢寫書當中，亦都有不少係推銷佢自己或者反駁質疑佢既人；另外既一D記載係講佢幾有錢，有幾多金，有幾多銀......其實感覺都幾搞笑，因為哩類型既事件通常出現得最多既係而家既八卦雜誌。

其實我真係幾羨慕佢，因為佢係歷史上眾多出名有成就既占卜師同神秘學家當中，係長壽、有錢有名、生活又輕鬆既占卜師，因為佢係自己開間書店仔，得閒招待下占卜既客人。雖然黃金黎明好多強人，但係好多都生活有點困苦又或者經歷過不太好既事。而Mlle Lenormand雖然都有坐過監，但次次都好快就放出黎就知其實佢好多出名客等緊佢，生活過得好，有錢又無憂，幾正咁。

（雖然現實既歷史同我地今日所知既可能有差距或者我地唔知佢內心諗乜，但都可以畀多份幻想空間畀自己。嘿嘿。）

繼續溫書，下次先再講返佢既占卜術。

電影橋段的紙牌預測

講起西洋占卜術又或者紙牌占卜既最初印象，雖然個畫面唔係好肯定係邊到睇過，但就算唔係好識既人，好多都大概會想像到一個畫面；就係一個幽暗既街角，隱隱若若咁有個帳篷，入面只有微弱既燭光，同坐住個蒙住頭巾既吉卜賽女人...佢帶住好多寶石定唔知咩戒指既手係到慢慢洗牌，然後逐張遂張咁抽出黎，係圓枱鋪出一個牌陣，係呢個時候......

相信大家睇到呢到都應該想像到係點，通常電影又或者小說劇情既占卜師預測既野都係好似似是而非，跟住去到最後又真係中左又或者令主角恍然大悟咁。哩d情節雖然行貨但如果係現實生活遇到都幾正（我自己個人覺得啦，同埋情節畫面都係我自己腦海浮現XD）。

最正既係通常戈D占卜師講好少野又中左，但其實又好似冇咩特別建議。相信如果有搵過我占卜又或者有睇過我寫既FAQ既朋友都知道，塔羅牌其實主要著重係分析一件事物幫問卜者更加清楚而家既情況，好少可會無啦啦無咩特別咁問黎緊有D咩特別事發生。

一直以黎相信絕大多數既人，就算係占卜師都好，對於紙牌類既占卜可能只係知道塔羅牌與撲克牌占卜，頂多或者都係近代既禪卡、天使神喻卡又或者水晶牌（總之都係近幾十年先出現既牌啦...你們懂的...|||），如果話要講出塔羅牌以外有過百年歷史既占卜牌真係無乜人講到。咁其實到底有冇D占卜術係好似哩D橋段又或者咁神奇呢？其實係真係有類似咁既占卜術，畢竟歷史流流長，就算淨係塔羅牌都發生過好多變化，所以又點會淨係得一種紙牌占卜術呢？其實有D真係好勁，用起上黎同塔羅牌比較別有另一番風味。

準備繼續睇書開牌，下次再講。信我，下一篇會更新得快好多^^。

占卜時朋友的作用

一般問塔羅牌好多時都係問卜者自己黎問，雖然有d客人都會帶朋友一齊黎聽，但係以我經驗都會比較少，當然可能有開實體店既行家可能情況會唔同。早陣子有兩位客人一齊黎搵我問牌，令我體會到又或者被提醒左「順便」帶多個朋友既用途。

其實好多人都會，當自己坐到係占卜師面前想問問題，聽完占卜師解完牌之後同自己所想既唔同，又或者有d人其實係想聽到自己想聽既野，又聽唔到既時候，有d人就會變得迷惘又或者有意無意選擇性地記得自己中意既野；當然身邊既另一位朋友因為其實發生既事係唔關自己事既時候，就會變得好有邏輯同斷判能力，亦都頓時變得溝通能力爆燈。

而今次兩位客人到自己問既時候要諗問題又或者聽完之後都有d愕然或者混亂，又話自己問哩d問題係咪好似好傻，而唔係占卜緊既另外一位就會突然變得好清晰，仲會提返自己個朋友想問既問題占卜師已經解答左你，突然一句「岩先你咪問左囉！」又或者「拿～佢既意思咪姐係......佢講得好清楚啦。」就好似變左係我既助教解讀員咁犀利。

其實朋友係占卜過程可以擔當幫手總結又或者記住d問卜者唔想記又或者唔記得既野，亦都可以幫手諗問題，通常問卜者諗唔到問咩既時候，身邊既朋友總係可以提出好有建設性既問題；但係當身邊既朋友成為問卜者坐係占卜師前面想問野既時候又頓時靜左。。。

而當時其中一位客人到最後都話自己好迷惘好唔想放低，占完成個鐘之後都唔記得占左d咩，淨係記得個男朋友冇第二個女人。我同佢講唔駛擔心，成個過程錄哂音有哂紀錄，之後你返到屋企日聽夜聽都得（當然我諗佢應該唔會日聽夜聽既），不過好在佢有個朋友陪佢黎問睇哂成個過程，如果唔係佢同人講返都好神秘...問左成粒鐘只係記得一兩個問題既答案，唔知既話好似我用迷煙迷左人又或者做左d唔知咩令佢乜都唔記得咁~_~

不過講到尾，其實每個人對於自己著緊同上心既事就會咁，包括自己作為占卜師都會有煩惱同有情緒既時候，差在大家點樣去平靜自己同選擇用咩態度去面對，見得多呢類型既客人就更加提醒自己對於任何既問題或者不安既時候都要處之泰然從容面對，如果唔係處理得唔好就只會衍生到更加多既問題同影響到自己生活其他方面。

從茶杯裡看到的未來 – 茶葉占卜

 

占卜一向都給人一種高深與神秘的印象，例如充滿圖像與符號的塔羅牌、以陰陽八卦解說世間萬物的易卜及吉卜賽人手上似乎可以透視未來的水晶球等等；一切一切看似神秘與高深莫測，就算筆者現在聽到有人說會占卜都會很好奇很想知道對方有什麼看家門領又或者學習何方門派的學問。但其實在占卜術當中也有一些比較簡單，而且所用的占卜工具都是經常會見到又可以很容易找到的。

 

不用說相信大家看到標題已經知道本文所講的就是茶葉占卜(Tasseomancy)。澳門作為華人主導的社會，而茶亦是中國人的國飲；然而流行用茶葉占卜的卻不是中國而是另外一個公認的飲茶大國－英國。當然占卜所用的茶葉並不是中國人的鐵觀音、普洱又或者龍井之類，而是英式紅茶，例如英式早餐茶，樣子大概在超市買一些西式紅茶茶包剪開看到入面的紅色碎茶葉那種。可能會有讀者會問為什麼一定要用英式紅茶，難道中國茶葉就不可以用來占卜嗎？的而且確是不可以的（以西方茶葉占卜來說）。

 

這裡就先介紹進行茶葉占卜的方法及其所需的用具，讀者們就自然會明白何以故不會使用中國茶葉來占卜；茶杯方面會選用傳統的英式茶杯，即英式下午餐所使用的那一種，要注意其形態必須是上闊下窄，有點像飯碗一樣，而且反轉杯子時杯口可以平伏在整隻碟子上。方法十分簡單，首先將大約三茶匙的茶葉放進茶杯裡，再倒入熱水沖泡一杯紅茶，（如果是沖泡一壺茶的話就不用將茶隔開，讓茶葉在斟茶時流進茶杯裡）之後便可以慢慢品嚐，順道放鬆心情讓內心平靜下來。

 

當茶湯喝到所剩無幾時，茶葉應幾乎全部已經沉底，茶喝完了，便是正式開始占卜的時候；首先拿起茶杯，想著所想占問的事情輕盪約三個圈（左右手皆可，順時針或逆時針皆可，但選擇了一個方向就三個圈都向同一個方向），然後反轉杯子倒蓋在碟子上，再順時針轉三個圈，然後便可以打開杯子看看占卜結果了！

 

 

打開茶杯後看到的大概會像圖片中的模樣，而解釋占卜結果卻是最易又最難的一步，容易的是因為沒有標準答案，又沒有要求特別的知識，一切近乎單憑直覺。困難的地方是卻也是因為剛才所說的原因，如何才能解得中又或者如何判斷茶葉所顯示的圖案就變得無所適從了。當然有靈修的底子與平時占卜的訓練對解釋占卜結果會有頗大影響。

 

一般的解釋方法是愈近杯邊發生的機會愈大及明顯，愈近杯底的則相反；解說由杯柄開始，先將杯柄指向自己，即六點鐘的方向（就像手錶的六點鐘是對著自己一樣），然而由杯柄的左邊順時針開始解說，去到杯柄的右邊，整整是剛好一個圈，這是代表一整年或者問卜者所設定的時限，假設問題是未來六個月的愛情運，那麼由六點鐘位置開始的是第一個月，去到五點鐘位置時便是第六個月的事情了。另外有些占卜專用的茶杯上印有不同的占星學符號用來作更深入的解釋便不適用這個方法了。

解釋方面都是按照符號的意思作提示，例如刀可以代表危險、意外；心形代表愛情或新的戀愛；船可以代表遠行；波浪代表不穩定的意思之類。當然這些解釋不多不少都帶點主觀成份或者每個人解釋的方法都可以有所出入，但最準確的一般都是第一眼望到的感覺所帶來的意思。
 

其實茶葉占卜的原理是透過上述的動作而令茶葉在杯子不同的位置散佈出不同的圖案，然後透過觀察圖案及當下的直覺獲得占卜的答案。所以如果是像鐵觀音那些大葉茶，就實在沒有可太大可能散佈出不同的圖案來解讀了。茶葉的作用其實是像散沙在杯子輕盪和反轉時形成不同的形狀，所以其實並不一定要用茶葉，磨碎了的咖啡豆亦可以，但記得要保持咖啡渣在杯中，否則喝完後什麼也沒有時很自然地一樣什麼圖形也沒有……

以後如果有機會嘆下午茶時便可以順道拿這個跟朋友們玩玩，又或者當一個茶餘飯後的話題。如果想認認真真拿來當占卜的話，就要多作練習和用其他的方法訓練自己的占卜能力了。

ABC君原來係佢...

上次講起占卜私隱既問題，提到有一次無意中知道有關朋友既事，諗返起有少少無言（原本想話尷尬，但諗落又唔關我事。）

事緣係朋友介紹左個客人搵我占卜，問卜者當然亦係例牌既妙齡女子問感情。正如朝早起身刷牙洗面例牌工作一樣，首先洗牌切牌開扇再叫那位女子抽牌先開整體運勢然後再抽牌細問。接住佢就係問有關同有可能發展對象既前景、對方點睇、遇到d咩阻力、佢身邊d人點睇大家既發展等等之類都會好多人問既問題。

講到哩到相信有好多搵過小弟占過愛情既客人都應該會記得問到涉及的對象們既時候（有d人係會同一時間有超過三位對象的。），小弟都會叫來客諗住ABC君，A係邊個、B係邊個、C係邊個，係個心諗住唔駛講我聽，但就自己要記得邊個係邊個。而戈時我又冇特登同佢咁講到，結果佢就講左個名出黎，點知係我識得的（假設叫Kelvin，事實當然唔係哩個名）...因為個名係比較特別，跟住介紹客人畀我既朋友亦叉多句埋黎，「係呀！係你識戈個呀。」，結果頭先提過戈d同對方會點、人地點睇自己、佢會唔會中意我既問題就變相全部變哂係Kelvin點睇我、我同Kelvin會點、Kelvin....#$%@$^$%、Kelvin...$%!$**%%#

Er...感覺有d奇怪，雖然唔關我事我亦都唔會講出去，但貿貿然知道左人地d私事，又唔係當時人講我聽，個心仲係有d唔知點。不過亦好彩我個A君朋友亦係正經人家，冇乜特別驚嚇既牌，個客人亦都冇話對佢做左d咩事；因為試過有d客遇到既真係世紀大賤男，如果因為客人黎占卜而知道自己朋友d衰野就...就真係其實唔知好過知。

所以此後，小弟就叫客人諗ABC君就唔好講名了，但係唔該真係自己要記得占卜當時所諗既ABC君係邊個，錄音唔會有講到名的。

最後，戈次就話係朋友姐，萬一...如果將來有一次，個客直接講個名出黎之後，「嘩！哩個咪我老豆個名？」咁就真係唔知點算好了....-__-|||

都係唔好問啦…

可能因為小弟正職係做銀行既關係，對於私隱哩d野會多少少考量，又或者因為我自己對自己既私隱都會幾在意；正所謂「己所不欲，勿施於人。」，我諗可能有d朋友又或者客人都會留意到問到相關問題時我都會幾猶疑（其實係叫你都係唔好問啦…），因為我自己本住既心態係令到問卜者清晰了解返圍繞自己既客觀情況之後等佢自己做返決定。
 

熱門既問題通常有：

「我個前度男友同佢而家個女友點？佢地感情有冇問題？」

「我想知我戈兩個同事咩關係？佢地對雙方之間點睇？」

……通常都係執著於前度既事、想法又或者八卦人地既野多。

不過係咪真係一條都唔答得或者唔問得呢？最怕既係答完之後開左個頭之後就會忍唔住不停咁想問落去，又或者有種點解之前問得又或者人地問得，而家又唔得既感覺。再者咁樣執著地問落去，以我既經驗，通常係令到問卜者思緒混亂多過真係了解自己既內在從而解決自己既問題。又或者咁講，換著係自己都唔希望人地走去問塔羅牌黎自己既私隱。

所以，都係唔好問啦…

回歸原點，其實黎問塔羅占卜係為咩呢？雖然岩先講到好似好嚴重咁，當然，可以當娛樂或者純粹聽下亦都可以無乜所謂啦，只係切忌沉迷。但係至於能力範疇睇唔睇到哩d咁私隱或者更深入既問題呢？其實係可以既…做占卜哩行，亦都有我地自己既「行政優勢」。

今日講到哩到，下次再講下無意中因客人而知道左朋友既私事…

強國許願法

 

唔知道岳飛泉下有知會點諗？

 

清明節既時候連住羅左幾日假自己一個去左杭州旅行，去到當然係周圍行下睇下景點，其中去到岳飛墓時見到呢個香爐真係呆一呆...清明時節雨紛紛當然戈排有雨落，但就真係唔知平時個香爐係咪裝滿水呢？當然我明白落雨既話就緊係有積水係到好正常啦。最呆既係入面有不少人民幣，紙幣硬幣都有...我相信應該不少人都會估到佢地係當許願池既概念，我仲見到有人羅個硬幣合十默唸完再擲落去，跟住紙幣都仲有，難道除左燒之後仲興用水？變唔到灰嫁喎...

我心諗，我國同胞清明拜祭方式日新月異、中西合壁、簡約方便....Anyway，惡搞完。似乎有部份人都真係缺乏邏輯先會咁做。其實岳飛唔會收到大家既人仔亦都唔會識得幫大家實現願望定保平安啦...

扔銀仔呢個方式其實係源自西方意大利羅馬既許願池，方法背住個池然後用右手向後扔（要係要飛過左邊膊頭上方）然後轉返身睇到佢跌落池到的，而且唔止扔一次，因為傳統上第一個願望係要許可以再次黎羅馬，之後再許既願先成功，亦都有話第二同第三個願望分別係要遇到中意既人同埋同中意既人可以共同一齊黎到許願池。版本有唔同但大致既都差唔多。

其實感覺有d似係扔許願帖上寶樹到，先不論羅馬既靈唔靈驗，但係將扔銀仔落水到許願哩個動作搬黎中國到周圍用就肯定唔會有效...就算少少，倒不如用黎幫助有需要既人，積多點功德，也許會變得更有意思。

最後教宗？羅馬人伯多祿

新一任宗教已經選出亦都舉行左就職彌撒，現任教宗方濟一世係十二世紀既教宗預言中被指為係最後一任教宗，稱為「羅馬人伯多祿」。最後一任教宗？即係點？根據預言所寫既紀錄似乎幾恐恐怖下，中文大概係「在對神聖羅馬教會的最後迫害中，（教會）將由羅馬人伯多祿所統治。他將在苦難中牧養主的羔羊。當這些完結後，七山之城將會被毀滅，令人敬畏的天主將審判他的子民。完結。」

成段咁睇，就算唔係世界末日，都係教會毀滅啦。可能大家睇既時候有個地方會唔係太明，就係咩叫七山之城呢？點解唔係八山又或者九山...其實七山之城係指羅馬城，因為羅馬係初期建立既政治中心係台伯河(Tiber)既東面，而戈到就係有七座山，當時既人最初就係住戈到再慢慢形式羅馬城既概念；但係講返既係...梵諦岡山並唔係戈七座山之一，只係大家好近，如果係呢段預言到睇其實筆者覺得大概係指繁華既城市中心都毀滅埋，咁可想像到幾恐怖。

而羅馬人伯多祿相信大家都睇到新聞講新任教宗方濟既父母都係意大利人所以可以咁解作，但亦有人講佢地係北部既人，係十二世紀既時候並不屬於羅馬城範圍既人...不過就當羅馬人係哩部份中左吧。而伯多祿同方濟有咩關係呢？聖方濟全名係St. Francis of Assisi，原名係Francesco di Pietro di Bernardone，而Pietro可以通作Peter，但係要講返既係據聞Pietro係方濟老豆個名...

另外，新任教皇既牧徽上面寫有IHS，IHS係指耶穌，係希臘文入面亦指漁夫；初期教會以捕魚黎代表收信徒，而伯多祿當年就係漁夫出身。

至於苦難係d咩？有人話係天災災難之類，亦都有人指教會被逼害(講真睇哂成個全球既宗教同政治格局，我真係完全唔覺得教會畀人逼害緊..)；唔知點解可能因為筆者既宗教觀比較廣，我信有天使有聖母亦同時相信有佛祖、太上老君之類，大家係哩個世界唔同既形式(或者範疇?)存在緊，所以對於某個指定宗教既神來到世上然後發生咩咩咩大事筆者係有保留的，唔通其他宗教既神坐定定睇住你係到滅世？

我覺得對於教會或者整個羅馬教廷信仰最大既災難係嚴重既腐敗同埋已經脫離原意既信仰。雖然教廷腐敗一早好多人咁認為，又或者係幾百年前已經存在甚至曾經發展到極致(獵殺女巫、十字軍東征、贖罪券、對科學既打壓)，但當時既人已經接受、又或者叫無力反抗。但而家資訊發達，又有咁多記者挖料爆醜聞，有時我都會諗，成個教廷又或者西方既主流宗教仲可以頂到幾耐？好似係得天主教先有自己既一個國家梵諦岡，又有自己既地頭，建立一個宗教中心去帶領全球號稱有十二億既信徒。

對於宗教既內容在此不作什麼評論，但係係哩個特殊既背景，資訊發達而又似乎收埋好多好多秘密既年代，呢個教宗一d都唔易做...(唔同以前我明燒你、搶你野都無事既年代)，唯有祝教宗你好運啦，大把人食左花生睇住你點樣帶領廣大信徒同好好管理教會(其實個個神父修女都有共同信仰點會有咁多哩d事XD，大家可以考量下)。

魔法油的迷思 亦請三思 (下)

今次繼續講魔法油，上一次講左d油製造左出黎要考慮佢掂唔掂，點功效要點製造出黎又或者點加持法。今日就以我自己既眼光黎去探討魔法油既法術運行。

當然要有下一步係假設左枝油係有料到，如果唔係已經可以唔駛點講，雖然我覺得單單係上一篇講既已經好值得質疑。

首先，油係Mass Production大量製作，對象係廣大客戶而不是度身訂造，所以係目標針對上會比較廣泛，唔同一般做儀式既法術可以好指明個願望係點，所以因為許願既清晰度有所不同而發揮到既功效程度都有唔同，當然如果有法師再幫個客用油黎落法係另一回事，但哩個已經涉及法師度身訂造既層面了。

雖然魔法油有好多種、好多隻色、好多唔同功效；但係其實講到尾主要都係兩樣野，亦都係作為占卜師聽得最好多既熱門問題，我諗聰明既你地應該已經估到啦，估到未？仲未估到？講出黎大家都實會同意，就係感情同錢。普遍大家都係煩哩d，咁同Work唔Work有咩關係呢？通聽得比較多都會覺得用係金錢既魔法油會比較有效，感情好似差咁d。主要原因好簡單，因為金錢可以淨係使用者自己既事，必須要影響到既人比較少。而感情話明係感情就一定要至少有兩個人先有感情哩件事啦，有d可能係增加追求者，又或者令分左手既另一半回心轉意等等之類，就會牽涉到第三者既自由意志，就咁樣既魔法油係改變唔到，如果買枝油自己查咁簡單就可以好似落降頭咁就真係好恐怖；第二就係人與人之間既係需要講緣份，亦都會有業力既關係；如果緣份已盡格硬黎既話一係無效一係搞d唔知咩出黎，對大家都唔好；如果有業力牽涉就又要再睇係咩情況，如果今世大家既業係注定對方恨你或者令你唔開心係你欠佢既，魔法油唔會幫到。係法術層面上要做亦要好大工程，亦唔建議，無謂錯完又錯愈搞愈麻煩盞最後累左大家。

相對金錢而言，感情所涉及到既因素係複雜好多好多，所以好自然因為上述原因好易令到感情既魔法油唔太有效；當然我冇試過冇親身經驗可以分享到大家（同時我諗我都冇咁既需要同唔會用到，所以應該冇機會同大家分享XD），但邏輯上同以我認知既情況會係咁。

最後另外一個因素其實係使用者既心態，如果本身信念強的話有可能明明枝油無乜料都變得效果明顯，因為哩個已經係涉及到使用者本身既信念去推動個法術；如果個使用者完全唔信或抱負面心態已經會令個法大打折扣。去到哩到，喂！可能有讀者已經覺得做乜咁似吸引力法則，你講哂啦哩d進可攻退可守既言論；其實，所謂既吸引力法則或者信念既力量係魔法最初階最基本既理論，當然係哩樣野上面仲有好多因素，正如好似上面提過既自由意志同業力之類。配合魔法油公司既Marketing攻勢如果佢地既廣告同口卑本身已經好好，令使用者信心大d已經有相輔相乘既功效，但係當然，其實都只係少少。

講左咁耐講到呢到，魔法油好似唔掂多過掂喎，其實都唔係既，只係哩樣野其實應該由個魔法師自己用草藥或者香薰然後自己整同調教，按照對應既配方整好之後，再專為件事或者客人既特定指明用途黎施法就會OK好多了；但記得做哩d之前個法師應該都要同做其他法術一樣，先占卜左做唔做得，會唔會有業力既問題先。

對於魔法油小弟既評價同睇法就大概係咁，如果大家有咩意見又或者有咩睇法，歡迎係到留言交流。^^

魔法油的迷思 亦請三思 (上)

 

提起現實生活中既魔法我諗最多人聽過應該係魔法油，澳門可能比較少，但係香港同外國都頗為流行；其實我覺得主要原因係因為多舖頭賣，而用法亦相當簡單，當中以Anna Riva同Lucky Mojo最為出名。對於魔法油哩家野筆耆我不是在行人，但係對於哩樣野其實我都幾抱有一個懷疑態度，亦都想係到同大家分享下，如果大家有咩意見亦都歡迎發表，希望可以拋磚引玉。

首先第一樣要考慮既佢掂唔掂？到底係咪真係有功效呢？

當然掂唔掂我並唔係指搵見證人又或者問下親身試過既人，因為總有work有唔work既情況；反而我只係以我所認知有關西方魔法既原理同大家分析。當然要有功效既話枝油要落左法係入面，除非魔法油既世界可以將d草藥配埋一齊浸油就有功效，但呢個以我認知係應該無乜可能，頂多係象徵意義上一d好廣泛既代表意思又或者意頭；換而言之，姐係一定要有法師做過儀式令枝油有料到。然後問題就黎了，法術可以Mass Production一次過批量生產好似工廠機器咁製造出黎？要做既話一係對住d 草藥，一係對住堆未入樽既油，一係對住埋入好哂樽既製作品，當然可能每一樣上述既野都獨立做一次又得。

但係有冇咁多人做法術既Mass Production加落d油到呢？仲要係咁多種唔同既油同埋咁d魔法油賣到世界各地，要做足咁多個功效既儀式又或者咁大量既油，個功效可以有幾大真係幾令人懷疑，而且大量生產亦都代表左枝魔法油好難可以做到好清晰明確既情況，你話做好少份量然後由個魔法師度身訂製為個案主做儀式同埋解決佢面對既問題就合理好多。魔法儀式唔同工廠生產程序大家不停負責其中一步，又或者除非魔法油公司發明左將魔法儀式分工流水式一個個步驟咁做...Well, 係真的話咁會係魔法史上既一大突破喇。

今日講住咁多先，下次再繼續更進一步既討論。

蛇年開爐

小弟由於最緊都幾忙，所以少左更新，黎緊會更新得密D =]。點都好，新一年新開始係到同各位讀書拜年，祝大家黎緊新一年身體健康、萬事勝意、賺多D做少D、愛情事業樣樣都如意。講完拜年說話之後都同大家分享一句我經常都提自己既話，就係咩時候都好，都要活好自己既人生。人生條路既大方向可能天生已經生出，但係點樣去行面前既路同用咩態度面對，就絕對係大家自由意志去選擇。

今個新年做寫字樓既大多數都係放到星期三，幸好小弟老闆皇恩浩蕩畀我羅多兩日假放到星期一；拜年活動之後可以休息下仲可以多幾日睇下書。

同門相聚

 

話說剛剛過去的星期日，我自己一個過左香港同兩位都係黃金黎明學派既朋友一齊聚下、溫下習，雖然最後變相似吹水多...不過同門相聚見下面，大家交流下心得其實都係一件好事，起碼感覺無咁悶，同埋動力會大d，講真有時自己一個日練夜練其實有時都覺得有枯燥。我諗應該好多學左有咁上下資歷既朋友都應該會明白。

當然話就話好多時間吹左水，但其實大家都有帶書同自己既筆記出黎。係大家討論同埋一問一答既情況下相對平時自己睇書亦覺得有趣好多，更重要既係大家言語之間傾計討論黎複習既話亦都易d入腦，而且好肯定一樣野就係唔會好似睇書咁唔夠精神會恰眼訓XD

而家暫定大約每兩個月就出黎聚一次，期待下次聚會。