紙牌的預測（一）

相信市面上大家一直聽得最多既西式占卜都係塔羅牌，然而塔羅牌都係其實偏向分析事物同用黎獲得啟示既占卜工具，多過預測事件既發生。係咪完全不能預測呢？好多時我都會同客人講係現在既延伸，而唔係絕對既將來。

而塔羅牌本身既強項係針於對人既內在感受、想法、動機之類，比較少係針對事件既發展，又或者要花比較大既功夫先可以測得到。咁當然西方既紙牌類占卜除左塔羅之外仲有好多好多其他種，小弟都係係應用中感到塔羅係呢方面有不足之處所以最近呢一年既時間都有嘗試都搵同埋測試其他既占卜方法，出黎既效果可以好滿意，剛好可以同塔羅互補得到，呢個就係Lenormand。

主要原因係因為新發現到既Lenormand（其實都唔新，只係最近呢一兩年先被英語世界既人所認識）係以占測事件既發生為主，同樣佢既不足之處係比較難分析人既諗法或者思緒，兩者既比較之下用塔羅牌就好像同一個好有智慧既老年人對話，客觀咁反映出情況。而Lenormand就係去睇事情既發展，主要針對事件方面，比較簡單快捷，但問到點改善既時候Lenormand就會突然窒一窒。

當然其實兩種占卜術都可以做到大家強項既野，但係各有各既存在價值，講左咁耐到底Lenormand係d乜，下次再同大家分解。

動力與題荒

相信大家都知道小弟一直都係副業形式黎做占卜既工作，然而最近忙緊新既工作所以幾個月都無更新，但係就多左頗多人睇完我哩到寫既野而想搵我占卜。其實都有少少驚喜，因為一直都諗住自己咁懶無乜更新都應該無咩人睇，甚至乎可能完全無人睇；但事實視乎有少少出入，起碼叫想像中多，所以其實某程度上都畀到少少動力，又或者壓力推我去係到寫下野啦～哈哈。

因為原來寫既野真係有人會有心機睇下。

其實有時唔係唔想寫，只係好多時都會想寫d特別少少既野，又或者至少唔想咁「行貨」，變相就其實諗題目就比較難了，當然可以話自己係哩方面要求可能會想高d，但係要保持住有野寫有野出其實真係唔容易；所以我自己對於有d人可以真係做到日日有blog文出既人係非常佩服，因為要求既唔單止淨係個腦要諗到題目或者想講既野，要有咁好心機日日堅持先係最難得。

講到哩到，下一篇要寫d咩已經大概諗到，會快d擺上黎XD，遲d再談。

你想我聽你講左先，定係乜都唔駛講直接抽牌呢？

早排接左一個Booking，客人好有心咁寄左封email畀我做回饋，好開心個客人係email到贊我(唔係Hard sell，佢真係贊的)；其實咁耐以黎真係第一次有客咁有心咁之後再聯絡我咁傾，因為平時通常都係口頭贊或者介紹朋友黎，而佢畀我既mail睇到既感覺好似人地外國好興戈D既Testimonial列返d客點樣贊咁擺出黎。

當然以下落黎唔係同大家分享佢點贊我啦。

哩位客人有同我提到同客人既溝通同埋覺得長期做一個塔羅師可能需要培養耐性好似兼做心理輔導咁；咁其實同客人既溝通當然自然會變相聽到客人講既好多野。有d占卜師覺得要照顧個客既感受陪佢傾下計，有d占卜師就覺得兩樣野係分開反而太多心理輔導會變左唔係占卜會唔太專業。

當然其實哩d係個人風格同埋取向，冇話邊樣好d或者岩定唔岩。

但係我自己有個考慮就係如果問得太多或者聽得太多，會好易感覺比人好似「套料」咁；唔同既占卜師有唔同風格，自然唔同既客人都有唔同既口味。有d人會好似我哩位客人咁可能想多少少既交通或者占卜師畀多少少耐性；但有d人唔係咁諗嫁喎，會覺得，「而家我畀錢你緊係我聽你講，唔係你聽我講囉。你知我咁多野都係套料姐，陣間照住講返差唔多既野就得啦。你有冇料到嫁？」

作為占卜師其實我都幾避忌哩樣野，所以搵我占過既客人都會知道，我唔會點問個客人問題，頂多係抽牌問愛情既時候問佢而家有冇對象，有既就諗住佢抽啦。而我唔識你，你又唔識我，我又冇問你d乜既情況下講中個客既現況，咁佢再抽牌問之後既事其實佢會放心d又或者信心大d，相對成個過程又會流暢d。

因為有d情況或者問題，係真係好易比人感覺你聽我講左我d野你實咁講啦。

試過有位即將畢業既大學生問牌占卜，想問事業如果發展一樣新既範疇，由頭開始讀多個學位做戈行既前景會點。得出結果既意思係哩種工作係好煩而且實際無想像中咁好，錢就肯定搵唔到話特別富裕，最大問題係會嚴重影響自己精神狀態甚至會影響到私人生活或者用埋自己私人生活時間黎做野。

之後佢講返原來佢想讀多個學位係做社工，咁我就明哂點解會占到咁既結果。試諗下如果我知道佢想做社工讀多個學位前景點，如果我咁講就好似因為佢講左係社工我先咁講。

不過最後當然到最後其實我覺得睇返個客人想要點樣既方式同埋係咩情況，其實唔同既方式我都無問題，不過其實既然有客人係中意咁樣多d，我都應該要考慮下點樣去處理同客人溝通既方式了。

罐頭祝福短訊...不悶嗎？

你最近收到的祝福訊息，是市面上早已打包好用來互傳的罐頭訊息，還是朋友逐個逐個字打出來發給你的訊息呢？

剛進入2014年，「三、二、一！Happy New Year！」相信很多人在Whatsapp都收到不少新年快樂的祝賀短訊、圖片又或者短片，反正包羅萬有。不過，其實當你收到的時候，你會否覺得「嘩！好開心呀！」？相信很多人都會，用兩秒不到的時間，望一望，「哦。」，然後要不然一句「Thx~ u too^^」，又或者複製其他朋友傳送過來的短訊（當然是其他款式的罐頭），然後傳送比這位眼前要回覆的朋友，按下傳送鍵，兩個剔剔，傳送完畢，任務完成。

其實就像要交功課又或者為傳送而傳送，又或者你收到這樣的短訊時，其實會真的感到窩心與溫暖嗎？

踏入2014年的時候，我收到一個毫無裝飾的祝賀短訊而令我覺得「咦？OK WO，好多謝你。」

內容是這樣的：
「Hey Justin, 新年快樂 Happy New Year ah! 知你最近搵緊舖想開茶室, 祝你新一年可以搵到做你想做既野啦, 得閒keep cotact~^^」

簡單的文字與心意，有時候，會比眼花撩亂的emoji及圖像更令人覺得窩心。因為看得出這個訊息逐隻逐隻字打出來，而不是去銀行匯了幾千萬給您，千萬要快樂、千萬要健康、千萬要......同時收到兩個這樣的訊息時，當時當刻，你感到的又會什麼呢？

下次，當你想再廣發賀年短訊又或者節日祝福時，倒不如特別選擇幾個尤其重視的人，簡簡單單打幾個字，直接打出那個人的名字，送上你對他們真誠的祝福吧。

沒有華麗的圖案、沒有可愛的動畫、沒有精心的設計，廖廖可數的幾個字，有的真誠的心意。其實，那些精美設計的短訊，只是「複製」，然後「貼上」，跟超市貨架上的罐頭一樣清一色的感覺。

如果喜歡的話就請轉載，令多一點人看到，希望可以令人與人之間的溝通真實一點，而不是罐頭訊息周圍飛吧。