每位占卜師都可能曾經有過的駐場經驗

駐場占卜呢四隻字對於好多占卜師相信都唔會太陌生，以我所知有唔少人開始佢地既占卜生涯都係機緣巧合，又或者有人問有冇興趣試下合作，然後業餘身份開始。畢竟好多人剛開始做占卜都係約出黎占比較多。

雖然我而家都係Part Time形式做占卜既工作，不過當年都係由係漁人碼頭做駐場開始，之後又試過係Magic Cafe，睇返記錄原來已經係成五年前。

點解會突然講起呢樣野因為最近有香港行家問起我有冇做過駐場占卜，效果點樣？我第一件事問佢既係咩餐廳咩場？因為其實就算有料都好，係咩場到做係超級直接影響個占卜師既名聲同印象（其實都算係廢話，不過大家聽到有人搵自己合作好似有錢搵既話，總係會個心郁左先既。。。）

然後戈位香港行家同我講話有酒吧傾過，一聽其實已經唔駛諗。因為本身識你或者有心想占卜既，唔會想去酒吧，去劈酒既又未必真係咁有心或者想占，先唔講環境太嘈影響到占卜師既狀態，個客自己飲到WING WING地，都未必諗得清自己想問咩。問完之後再飲酒，醉左就算係你真係占得準，都唔記得你講左D咩。

咁咩場先適合做駐場占卜呢？當然最好環境優雅，稍為有格調D同埋唔好太嘈啦；但係最重要都係有FEEL真係傾計傾心事既地方，成班姊妹淘吹水傾心事，旁邊有占卜師又可以幫手下自然係add bonus，成班女仔傾得熱鬧時聽到你問完我又想問，咁樣既效果好好多又多D機會表現占卜師自己，唔駛做路人甲。

紙牌的預測（三）

之前介紹Lenormand有提到每一張牌有相對應既啤牌，而Lenormand得36張，啤牌有52張，咦？好似唔係好岩數喎。

係呀，Lenormand對應既啤牌係冇左四個花既2-5號既牌，咁就岩數啦。而事實上以前係歐洲，尤係主要係法國同德國用既啤牌占卜通常都係32或者36張牌，32張既就係少埋四個花既6號牌。係Lenormand出現之前歐洲人用既占卜牌大概都係咁樣，亦有52張牌既玩法。但資料得返好少又或者唔係英文所以好難考究。

Anyway，啤牌其實都係用黎占卜既，最早發明時都係占卜用，而而家既啤牌形制大概係十四世紀末期既時候由德國既僧侶既記載最先見到，但到底歷史點樣黎係一個謎。另外，古時用黎占卜既啤牌既角落頭係唔會有數字同寫住個花，呢D係後來方便大家玩啤牌既時候發明而加上去。

不過啤牌又係另一套占卜系統，又或者咁講，本身啤牌呢樣野都包括左唔同既占卜系統，除左用既牌數唔同之外，有D會用埋逆位，唔同系統或者唔同地方既傳統又會有唔同意思，係比較複雜，又有D 模稜兩可，連外國人都覺得好少資料好難搵。

基於接觸左Lenormand之後，引發左我對啤牌占卜既好奇心，跟住就開始搵資料去了解，同埋另一個特別要提既係，通常睇到幾百年前油畫入面既占卜師都係用啤牌，而唔係用塔羅牌。呢個係咩原因我都唔係好知，但係反正就係真係得一款。

同埋發覺用起上黎都幾型，當用普通啤牌咩公仔都冇既時候可以占卜得中D人會覺得你好犀利。更重要既原因係，啤牌好易搵到，唔同塔羅牌要特登係外國訂，有咩事都可以隨時買到，呢樣真係方便好多。

紙牌的預測（二）

上次提到Lenormand呢種牌到底係D乜，今次繼續。

因為一直睇得太多資料，一下子要講得哂可能會比較複雜，以下重點一個個講。

一）牌既數目：36張。

二）Lenormand既意思？其實Lenormand係拿破崙時代一個占卜師，出名在於佢係拿破崙既老婆Josephine未上位既時候已經預測佢將來會做皇后，後來亦因為咁呢個占卜師成名，詳細可以參考之前既史上最出名同最賺錢既占卜師Marie Ann Lenormand。但呢副牌同佢其實無關，係佢死左之後兩年左右出左一個遊戲叫Game of Hope，呢副牌亦會用黎占卜，因為Marketing原因而用左佢個名，所以正式黎講，佢唔係用呢副牌。

三）同塔羅有咩唔同？塔羅每一張牌上面既圖像同符號都有唔同既代表同意思，塔羅係好按照牌面既符號內容同象徵意思黎去解牌，而呢副牌既36張牌要解既時候百份百唔駛睇個圖像，純粹按牌本身既意思。如果話塔羅好似看圖說故事，咁Lenormand就係用唔同既生字去造句子；另外Lenormand係好依賴幾張牌連埋一齊做既組合黎去解，例如屋＋書呢兩隻牌放埋一齊就可以解圖書館，一間屋係同書有關，亦都可以解教育中心之類。Lenormand既牌全部都有對應既啤牌。

四）咁D對應既啤牌有冇咩關係或者點用？而家用基本上可以冇關係，係歷史流傳既時候有埋個啤牌既樣，但係牌既意思同對應既啤牌似乎D意思冇乜關係，又或者話而家普遍用既啤牌代表既意思同Lenormand既牌搭唔上，可能古時有用但而家失傳左，所以用既時候可以忽略。

五）玩法既牌用同塔羅有咩唔同？Lenormand基本上好少牌陣，由於好講求組合，好多時都係一條直線三張、五張又或者七張連續一齊去解，好似組句。如果九張就會好似九宮格咁擺，中間戈張牌重點再睇睇周邊圍住佢既牌有咩火花擦出新組合。最複雜戈個係36張用哂攤哂出黎好似睇一個大既卦象，但係係好複雜同埋用既時間好多，通常都係冇特定問題問就一次過睇下黎緊會點，睇下D牌有冇指出邊D野特別要留意。

今日講住咁多先～之後再介紹。