到底係手機定日記？

最近小弟換左新電話，終於闊別用左差唔多兩年部HTC，換左新機除左感受到流暢既速度同可以影靚相化外，亦都驚覺，點解自己可以容忍到用部龜速機用到咁耐...當然係好開心玩緊部新機之前，我已經將部舊既HTC小心翼翼咁保存好。

其實隨住功能愈黎愈多，手提電話愈黎愈緊要，哩到我唔係指純粹既打電話、send message、隨時check-in、影食物相擺埋Post up上facebook、銀行既流動理財、即時睇股票價格、查天氣、check email等等。當然唔係話哩d功能唔重要，只係哩d功能可以好隨意係第二部電話到用到；而記錄係電話既文字訊息同紀錄呢？就唔係咁易了，往往一部電話對主人最重要既地方，撇除日常功能，就係入面既相同message，簡單黎講係擔當日記既角色。

講起日記，曾幾何時有一輪好流行，但係曾經何時講緊既到底係幾時呢？「日記」而家聽落去既年代就好似阿媽少女年代既心事典藏，寫著今日同好姊妹搵青草街盲公問卜問姻緣講左d乜，又或者令人想起民國時代冬菇頭既北大女生晚上係宿舍寫著如何帶住熱血與理想組織學生運動，期望推動國家改善腐敗，急起直追，一雪中國人百年來的恥辱。

雖然而家已經冇咩人寫日記，但而家大家手上既智能手機，每日來來回回既message、whatapps、LINE、微信、手機入面既相同短片等等，其實早已稍稍地為交織出一篇又一篇真實無遺既日記，記錄低每日生活既喜怒哀樂同埋同身邊既人既溝通，包括阿媽既催歸家食飯短訊、同情人或者曖昧對象來來回回既甜言蜜語、同人嗌架時衝口而出忍左好耐既怨言等等...係呢個時代，經Whatapps、message講既野其實仲可能多過係電話同面對面講既野，再者，電話入面既文字全部都有紀錄，除非你刪走佢，如果唔係幾時睇返都得，我估好多人都應該試過係巴士、又或者夜晚係床到拎住部電話係到LOOP，睇返同一d重要既人既chat record。所以，當我換左新電話之後，唯一唔可以換走落新電話到既，就係入面既文字記錄，哩個亦都係令我會繼續好好保存我部電話既原因。

最後，大家有幾多次睇完電話既message會對住個電話微微嘴笑又或者好苦惱呢？種種勾勾起我地情緒既回憶、帶黎希望與失望既事、其實好多時都記錄左係我地既電話當中，我諗，老左既時候睇返電話所記錄既野，其實都應該會幾搞笑。

占卜常見問題

最近發覺其實好多人對占卜其實都唔係太了解，所以特意寫左個常見問題出黎，等大家可以了解多d同埋更加清楚明白大家可以期望占卜可以做到同做唔到d 咩，同樣既內容亦都更新左係服務及收費既部份，而第7-10點係純粹有關我本人既占卜服務，有興趣既可以睇埋。

另外小弟亦呼籲各位朋友係搵占卜師之前（就算唔係搵我都好），睇睇下面既FAQ，相信對大家都會有所幫助。

有關紙牌占卜的常見問題
1. 占卜是什麼？
占卜是可用來分析事情的發展及顯示最大可能的結果，從而協助問卜者了解周遭的客觀情況而作出判斷及改善。

另可參閱
紙牌的預測（一）
紙牌的預測（二）
紙牌的預測（三）

2. 占卜在是否預知未來？占卜得出來的結果可否改變？
占卜所預示的是現在的延伸，又或者說是最大可能的結果，而不是預知絕對的將來，因為每個人都有自己的自由意志可以作出決定而令運程有所改善，故占卜得出來的結果是可以改變的，很多時在占卜當中亦可以看到問卜者可以怎樣改善面對的情況。當然，人縱使有自由意志，但命運並不是百份百能完全自主，有些事情是人為可以改善的，但總有些事情是人無法控制時，就會從占卜當中會看到必然的發展了。

3. 占卜會不會很邪門？會否有危險性？
一般的紙牌類占卜與鬼神無關，亦不會牽涉什麼靈體，只是純粹將客觀事情反映出來，並沒有什麼危險性。同樣地，麻雀可以作閒時娛樂，亦有人賭博上癮不能自拔；facebook可以方便訊息傳播及社交，卻有人因沉迷其中而不懂得於現實生活與別人交流。占卜所用的牌究竟都只是一副紙牌，由印刷廠印出來的東西，並不會走火又或者招惹什麼（如果會的話那麼雜誌、報紙、漫畫都有機會邪門了…），有些人口中所謂的危險，其實並不在於副牌，而是在於自己面對煩惱時的心態能否取得平衡。

4. 占卜有沒有禁忌？什麼情況下不應該問卜？
問卜時應保持心境平靜，我們並不建議問卜者於情緒激動或感覺到十分疲倦時進行占卜，除了問卜者很難理性地去思考所發問的問題外，亦會對抽牌的準確度造成很大的影響。在此再次提醒，占卜只是為問卜者作出分析及提示，故並不應該依賴占卜來作出決定。

5. 同一個問題可否反覆占卜？
這需視乎問卜者所提問的問題，例如占卜每天的運程那當然可以每天都可以重覆問「今天運情如何？」。一般來講除非所問占卜的事情突然出現，否則並不建議重覆發占，因為這樣已代表問卜者是想聽到自己想要的答案遠遠多於想要實際答案，這樣測試或主觀的心態，最終只會受到問卜者強烈的主觀情緒而令到牌顯示出問卜者心中所想的答案，又或者得出的答案並不準確，實際上並無意義。其實不論中西方的占卜術，都不建議短時間內重覆占卜同一問題。以我們的經驗建議不少於一個月的時間才重覆占卜。

6. 占卜可以占多長遠的事情？
一般紙牌類的占卜可以卜到到最長達一年的事情發展，如問卜者需要占卜更長例如兩三年之後的事情發展則準確度會有所偏差。這是因為當中涉及很多的人為變數，包括問卜者自身處事取態的改變及其他人為因素。此外，占卜是卜而不是算命，故重點在於分析問卜者面前的事情發展及旨在協助問卜者改善當下的情況多於進行預測，故一般所占卜的問題都不會超過一年。

7. 占卜有沒有事情是不可以問的？
投資賭博、生死、有關他人私隱及國家大事是不可以問的。

8. 占卜是怎樣進行與問問題的？20分鐘與30分鐘的占卜有什麼分別？
問卜者可於所選的時間內問想知道的事，當中會按問題的類型而使用不同的占卜紙牌；塔羅的形式由占卜師抽洗牌及開扇，然後由問卜者抽牌，樸克及Lenormand則由占卜師洗牌及抽牌；而所的事情不限，可以先問有關愛情運再問事業運諸如此類；問卜過程一般是先問大綱再針對地問個別問題，例如愛情運可以問「對方對我的看法是怎樣？」、「大家相處的關係有什麼需要注意改善的地方？」、「下一個情人的會是怎樣的？」，然後可以再問「工作上應如何爭取上司的欣賞？」。20分鐘與30分鐘故名思義只是時間與價錢上的分別，一般20分鐘其實已經足夠；如果問卜者認為有需要的話可以臨時選擇延長至30分鐘。

9. 占卜會在什麼地方進行？
由於本人是自由職業形式進行占卜工作，並沒有固定店舖，故占卜一般會約在澳門區環境比較寧靜及少人的咖啡店或餐廳進行。占卜師自己會點一杯飲品，客人並不必要另外點餐消費，請放心=] ；詳細地點可與我們聯絡查詢。如需在氹仔區進行，需另加車費80元。

10. 占卜內容會否有其他人知道？是否絕對保密？
占卜內容絕對保密。占卜內容的保密是占卜師最基本及必須遵守的規則，本人保證絕不會向任何人透露有關任何有關問卜者的任何個人資料。

11. 三天內傳送的占卜紀錄是怎樣的？
占卜紀錄即占卜過程之錄音，以便問卜者可於之後收聽當時所問的問題及答案，毋需擔心忘記占卜時所得到的答案。

facebook: http://facebook.westernmagick.com 

我自小的魔法師志願

最近有個非常要好既朋友達成左佢細個一路以黎既夢想，就係成為機師係香港既機場駕駛住飛機升降，呢幾日佢終於佢達成到仲影左好多相畀我睇，身為佢朋友當然替佢咁感到高興啦，佢亦都好開心好激動咁同我分享佢既感受有幾大、有幾感動。講真，可以一路堅持不畏風雨咁追隨自己既夢想係好難得，可以成功做到就更加難得，所以對佢既堅持我真係由心地佩服，唔知道有緣睇到哩到既朋友們，你地又有幾多人係堅定不移既道路上追求自己既夢想呢？

當佢好開心咁同我講既時候，其實都有令我反思返自己既志願，到底其實自己係想點？諗返起細個（大約四歲到）既志願，其實係真係做一個魔法師。聽落去其實好好笑吧？相信而家既大人如果聽到一個小朋友想做魔法師的話，都會係覺得「哩個靚仔睇得太多電視打得太多機啦...」；當然當其時既我的而且確係發緊夢啦，未聽過塔羅牌、什麼符咒法術，更加唔好講咩黃金黎明、Witchcraft、卡巴拉、天使學之類，只係當時覺得「魔法師」哩樣野好型好正咁。不過，對於靈異事物同埋科學解釋唔到既超自然事物，的確係自小已經有興趣，可能係出自於對世界既好奇掛？反正哩d野，都冇點解。

係去到後來大約中二、三到就開始真正接觸到我頭先講既專業名詞，「嘩！原來真係有魔法。」，當然深入了解左之後又發現係另一個世界，又有幸地認識到自己既啟蒙老師，發現同想像中既野又好唔同，但係又真係開展左自己既眼光同埋思維，於是就開始追求了。而哩類型既興趣同占卜算命既行業，係陳振聰件事爆出黎之前，已經好多時畀人感覺呃神騙鬼、難登大雅之堂。而我唔信哩d野既父母當然唔多中意我接觸哩方面既野，覺得無聊哂時間，但好在都無點太大阻止，始終我讀書無問題順順利利畢業然後而家做緊份銀行工就OK；試下如果我話要辭職潛心鑽研，可能佢會羅住把刀押我返工好似押赴刑場咁(講笑)。事實上，話辭左份工去潛心修行、不食人間煙火，自問無咁既慧根去到哩個地步；靠呢行搵飯食現階段亦不太實際。當然，自己希望有一日係哩方面會學有所成去到超高手境界，而家亦只得靠自己慢慢繼續努力。

不過講真，有幾多人既夢想係真係好實際呢？可能大家會聽到有人想嫁入豪門、有人想買野唔駛睇價錢、有人想考到CFA / CPA做金融才俊；係哩個拜金主義社會，其實又有幾多人會知道自己個心係想做咩先開心，又或者記得自己細個既志願又去努力實行緊呢？做緊會計師、財務分析師既、係投行每個月抖緊超過十皮、每日為英美股東搏殺既金融才俊美女，又或者近d，係澳門賭場搵到好多錢既人，其實有幾多小時候既志願係想做哩d呢？定係其實都只係「打份工姐」既心態呢？

我都唔知...但如果一個小朋友，唔好話幾歲，就算有十二三歲既，同我講佢志願係四大到做會計師（會計界既朋友請恕我覺得會計好悶同好似無乜工作上既滿足感）又或者話做投資銀行搵大錢既話，我會覺得好恐怖，同埋好懷疑到底佢真係真心想做，只係父母親戚不斷灌輸佢哩行實搵到工搵到錢又穩定又係專業人仕既結果。當哩種風氣愈來愈強，愈黎愈年輕化既時候，我地既社會會變成點呢？可能大家都會放棄做d似乎唔可能，但又可能其實令人生好精彩、令自己好滿足既事吧。

我個好朋友佢細個話想做機師時都有受過人地既冷言冷語，覺得讀學渣飛機出路太少，又好難，唔會成功之類；然而佢而家就真係成功，仲好享受自己既生活。其實講到底，都係要自己堅持，有時都要反問返自己一句，到底自己既堅持又有幾多呢？

祝願大家　初心恆在

塔羅牌與名牌包包

塔羅牌其中一種最特別既地方係一種占卜術但係可以有好多唔同樣既架生，哩到我指既架生即係可以有好多唔同款既牌，唔同文王卦大家都係用三個乾隆錢，又或者好似地卜咁係沙地或者有紙有筆就搞掂；我諗就算唔係行內人都會知或者見過有好多唔同款既牌，而我亦都相信冇乜塔羅牌占卜師會一副用到老，又或者用過哂所有牌，畢竟人總係會貪新鮮想擁有多d但係又冇可能擁有哂全部既，正如好多女生會為Hermes、miu miu、Dior、Gucci既包包瘋狂但我估應該無乜人會買齊哂所有袋...

占卜師用唔同既牌同女仕們用唔同既包包一樣，代表左自己既喜好之餘，亦都突顯出自己既品味同眼光。塔羅牌一樣有好幾種唔同風格，有法式古典詩意既馬賽塔羅(Tarot de Marseille)、現代風格與神秘學元素結合既偉特塔羅(Rider Waite)、由神秘學天才Aleister Crowley創作充滿奇幻風格既托特牌(Thoth)...等等其實仲有其他，不過小弟就快詞窮了...哈哈。

其實如果係特別d又難既塔羅牌，仲可以流露出自己係神秘學上既深厚底子，正如手握Magickal Tarot of Golden Dawn，一張張牌排出生命樹牌陣，雙目有神咁同客人講解希伯來字母同牌義既對應，點樣竊漏左解決而家係感情上既困局；當然亦都會有人純粹覺得「我要型！」而搵d出名難既牌黎用，但係乜都唔識隨便黎既情況下，根本就唔知副牌型係邊，感覺猶如某d暴發戶走入包包名店到大聲喊叫「給我拿個最貴的出來！」，掃完最貴貨之後坐係石梯級到抽番啖戒不甩忘不了的紅雙喜，卻不知道手上「那個最貴的」到底貴係邊...

當然回歸到最原點，手袋可以純粹當真係羅黎裝野唔睇款，牌亦都可以用最基本最原始，設計唔係亂咁黎，占得準就得。始終，占得準緊要過用副靚牌。

話時話講起名牌手袋Hermes，其實Hermes係神名亦都同神秘學好有關係，有緣再講。

萬聖節之後的諸聖節與追思節

每年既11月2日，對好多澳門人黎講係休息既一日，因為哩個係澳門既公眾假期（廢話，不過我發覺好多香港朋友都唔知...）；當然如果係紅底學校或者返工係跟勞工假既朋友就無得放啦，但係政府部門、大學、銀行同埋好多寫字樓工都放。同萬聖節咁近，請假請埋11月1日咁10月31晚玩到癲一癲都有兩日可以休息下啦。

當然兩個日子如此接近又係西方節日，其實萬聖節同追思節都真係幾有關係的；話說塞爾特人過左咁多年萬聖節既傳統，據說到後來天主教傳教士踏上哩遍英倫土地見到如斯情境當然唔高興。於是就係後面11月1日整左個諸聖節（All Saints Day），係紀念同贊頌天上既靈魂與聖人，再之後戈日就追思節（All Souls Day）就係用黎紀念先人同埋為煉獄既靈魂祈禱，等佢地可以早日上天堂；因為係天主教入面除左有天堂地獄之外仲有個煉獄，係畀d有犯罪但罪不至下地獄既人受苦，等佢地既靈魂煉乾煉淨先可以上天堂，而煉獄既靈魂係唔可以為自己祈禱，只能夠係在世既人為佢地祈禱。以前中學讀天主教學校既時候就每逢11月既彌撒同埋早禱唸經都會話特別為煉靈祈禱。

講講下好似有少少離題添，講返兩者既關係，我自己亦都有睇過有d天主教會組織或者宗教人仕指萬聖節係源自11月1日既諸聖節，又話Halloween係諸聖節（All Hallow's Eve）既愛爾蘭口音誤讀；雖然我無正式去翻查文獻又或者作什麼浩大考古工程，但以時間黎講，塞爾特人過萬聖節都過左唔止2000年，係耶穌出世之前就已經有了。如果計返教會成立之後傳教傳到去戈邊先再由愛爾蘭口音原因誤了個萬聖節出來的話，咁之前d記錄又點解釋先，其實有時我都覺得天主教既學校一樣有洗腦，只係大家多年黎已慣左所以已經唔覺得係d咩野...

Anyway，戈日放假的確係畀信仰天主教既朋友一個日子去紀念先人同埋為煉獄既靈魂祈禱，而對於我黎講多日假期可以訓到自然醒亦十分感恩，反正有假放就好了，而且今年既追思節係星期五，連住星期六日...正！