中餐定西餐？

作為占卜師好多時幫客人占完之後，總會有d客人想知點化解或者可以點改善；一般黎講最普遍既方式係睇返牌面上有咩建議又或者有d野可能係問卜者自己本身可以去做去改善，例如同另一半相處有咩注意又或對方點樣睇大家之間既感情；係比較從實際條件幫問卜者了解客觀情況。當然亦其實會有d例子係會用到一d法術又或者靈修上面既方法啦，唔係既話以前既法師同占卜師唔會係同一個人擔當哩兩個角色...

港澳地區係中西文化交匯地，好自然問卜既人有西式有中式選擇，應用起上黎都會有咁既情況亦都唔出奇。好簡單既一d旺桃花求愛情既都可以有中式有西式，自己亦有客人會問下塔羅牌又可能求下籤睇下八字。其實就算兩樣唔同既野我覺得都有空間MIX埋黎用，當然唔係一篇觀音經一篇聖母經梅花間竹咁唸啦；例如西式法師CHECK到一間屋有怨靈，可以選擇叫個客人自己搵中式師傅做超渡、或者教個客人唸佛、擺電子唸佛機咁，又或者可以搵魔法師做西洋魔法儀式趕佢走、又或者個客自己祈禱之餘、請Archangel Azrael黎接引佢到神既地方；又或者新居入伙想幫間屋「清潔」下，唔講d咩儀式拜四角定起結界，單以植物黎講，中式會用綠柚葉水黎抹，西式就會燒下鼠尾草；哩d情況可以考慮一邊燒鼠尾草一邊用綠柚葉水黎抹野，不過我諗應該無咩人會選擇會咁做除非間屋明顯地好有哩個「需要」。

對於同一問題可以有好多方法可以解決，當然剛才所講既只係打個比喻，暫時我又未遇到哩d例子。但以中國人社會為主同埋大家既習俗，如果真係有客同我講佢屋企中招了，當然首要會睇返佢有冇特別既信仰或者佢既接受程度，但我諗我多數會叫佢唸佛會多過搵天使。

所以其實雖然係學習西方神秘學，但有時都會推薦中式方法比d客人，情況就好似肚餓既時候，食中餐定西餐都可以飽肚，睇自己想食d咩啦...