西洋魔法書推薦：Wicca: A Guide for the Solitary Practitioner

較早前有寫過英文對於學習神秘學有幾重要，除左可以更容易學習到正確既知識外，仲可以分別到而家好多所謂既大師講既野堅唔堅，講到尾，其實都係要自己下苦功去學習同提昇自己既根底。既然之前講過個重要性，打後既時間小弟會寫d書評同大家分享下心得，想買英文神秘學書籍既朋友可以參考下。


Wicca: A Guide for the Solitary Practitioner
作者: Scott Cunningham
出版社: Llewellyn Publications
出版年份: 1989年 (超過20年歷史!)
版數: 240版
重量: 10.4安士

講起魔法巫術既入門書籍相信行內既人都無咩人唔識哩本書同埋作者(雖然唔係必讀書籍)，但卻係經典又易明；再加上十年前最率先傳入華人世界既既西洋魔法就係Witchcraft / Wicca，所以當年大家上網搵資料都會係同Wicca相關。除左哩本書本身叫Wicca個名已經改得好之外，佢既內容亦好清晰咁介紹Wicca同西洋魔法既基本概念，係後半部份又有d比初學者入門既練習同埋魔法儀式(佢d儀式有d 係自己間房張書枱到都做到，並不麻煩)。

唔知大家有冇留意到副標題 A Guide for the Solitary Practitioner，係西方巫術入面雖然會有一齊學習既團體Coven，所以同其他人一齊學習有前輩帶領固然好，但西方巫術同儀式魔法相比較之下，入會先學到好野既情況無咁強；因為比較偏向係一種宗教信仰多於係一種訓練系統，所以好多人其實係獨自修行，雖然無咁規範，但相對自由度大d，亦都係畀初學者好好探索既階段。

哩本書主要開頭講返Wicca既信仰、哲學與態度，而並沒有講太多長氣又悶既歷史、入會、參加Coven既比較等等，感覺有d似童話式咁介紹Wicca既風俗。之後既部份有講解魔法既簡單練習、技巧、每日既練習(例如放鬆同埋形象化視覺化技巧)，既有用又實際；而最後既部份有簡介同教少少有關唔同Wicca會同用到既知識，例如水晶、草藥同埋盧恩文(Runes)，當然每樣野都可以係一門獨立好深入既學問，但係作為簡介佢都算齊全之餘，以初學者既角度睇落去都幾得意好似好多野可以玩可以試咁。

最後仲有好重要既一樣！佢d英文寫得好簡單！

當年好多前輩都會推薦睇哩本書作為入門，之後如果對Wicca有興趣可以繼續搵哩位作者既其他書再了解多d。就算係學習黃金黎明Golden Dawn既都好，睇多少少唔同派別既入門書有個認知都好，大家都係法術，有所了解其實都係好事。

賣下廣告如果大家有興趣買請經下面條link黎買，你所付既價錢係正常價格，而小弟從中可以有些少微薄既佣金收入，賞面既話請經下面條link買就當支持下請小弟飲杯咖啡^^""。
Wicca: A Guide for the Solitary Practitioner

如果有咩問題或者意見，歡迎大家留言交流下^^"。